Drejtoria Komunale e Arsimit gjatë ditës së sotme mbajti mbledhjen e aktivit të drejtorëve të institucioneve edukativo-arsimore të Mitrovicës. Edhe pse mbledhjet brenda sektorit janë aktivitete rutinore dhe parimisht nuk paraqesin lajm interesant për publikun, Drejtoria e Arsimit e Mitrovicës u mundua që këtë mbledhje ta paraqes si aktivitet me rëndësi, duke lëshuar edhe komunikatë për media.
Se sa burokratike është zyra për media e komunës së Mitrovicës, shihet në paragrafin e dytë të komunikatës e cila thekson edhe përshendetjen që drejtoresha Kadriu ua ka bërë drejtorëve.
Pra, në vend se të synohet prezantimi i rezultateve dhe objektivave për të ardhmen në drejtim të ngritjes së cilësisë në arsim, shumica e institucioneve tona në nivel qendror e lokal lëshojnë komunikata të kota protokollare, transmeton Veriu.info
Lexoni komunikatën e plotë dhe vlerësojeni:
Drejtoria Komunale e Arsimit në Mitrovicë mbajti takim me drejtorët e shkollave
Drejtoria Komunale e Arsimit gjatë ditës së sotme mbajti mbledhjen e aktivit të drejtorëve të institucioneve edukativo-arsimore të Mitrovicës.
Këtë mbledhje e kryesori drejtoresha e DKA-së, Drita Kadriu, e cila fillimisht ka përshëndetur drejtorët e shkollave për pjesëmarrjen e tyre në këtë takim për ti përgëzuar më pas edhe për punën e tyre të palodhshme në ngritjen e cilësisë së arsimit në Mitrovicë.
Më tutje drejtoresha Kadriu, ka prezantuar rendin e ditës e ku u diskutua përkitazi me raportin përmbledhës të suksesit të gjysmëvjetorit të parë të vitit 2022/23, kalueshmëria sipas niveleve, ditët e teknologjisë së informacionit dhe komunikimit, projekti për kontrollimin mjekësor të nxënësve, raporti për vlerësimin “rapid” të shkollave si dhe pilotimi i aplikimit për regjistrim të nxënësve në shkolla të mesme të larta përmes platformës “e-shkollori”.
Lidhur me pikën e rendit të ditës projekti për kontrollimin mjekësor të nxënësve, drejtori i Drejtorisë së Shëndetësisë, Fahri Shabani, njoftoi drejtorët e shkollave lidhur me realizimin e këtij projekti i cili synon zbulimin e hershëm të ndonjë anomalie shëndetësore për nxënësit e shkollave të mesme dhe fillore të Komunës së Mitrovicës.
Ai më tutje ka shtuar se projekti do të realizohet fillimisht në shkollat e mesme për të vazhduar më pas edhe me shkollat e tjera të qytetit.
“Ekipet shëndetësore do të bëjnë matjen e 33 parametrave shëndetësor tek nxënësit ku si drejtori kemi ngritur 5 ekipe të cilat do të shërbejnë në teren ndërsa të përfshirë janë edhe 50 punëtorë tjerë shëndetësor të cilët do të sigurojnë informata për shëndetin e fëmijëve tanë” theksoi drejtori Shabani.
Drejtorët e shkollave së bashku me përfaqësuesit e Drejtorisë Komunale të Arsimit kanë shqyrtuar pikat e tjera të rendit të ditës por është diskutuar edhe për tema të tjera të cilat kanë të bëjnë me proceset edukativo-arsimore.
