Ish luftëtari i UÇK-së që u kishte shpëtuar shumë betejave të suksesshme kundrejt forcave ushtarake dhe policore serbe, gjeti vdekjen rreth 6 vite pas përfundimit të luftës.
Vëllai i ish kryeministrit dhe ish komandantit të UÇK-së, Ramush Haradinajt, Enver Haradinaj ishte vetëm 25 vjeç kur do të qëllohej për vdekje në një nga atentatet më enigmatike të pasluftës, raporton Gazeta Online Veriu.info.
Ai ishte vrarë në pritë, derisa po kthehej nga Peja në Deçan. Mbi të ishte hedhur breshëri plumbash mes fshatit Lubeniq dhe Raushiq, në magjistralen Pejë-Gjakovë.
Enveri ndodhej në xhipin e tipit “Opel Montero”, ngjyrë vishnje.
Nga vetura që kishte parakaluar xhipin ishte shtënë gjatë disa dhjetëra metrave. Burime nga vendi ngjarjes tregonin se vetura kishte qenë e tipit “Audi 80”, ngjyrë e kuqe. Por, policia nuk kishte dhënë ndonjë hollësi, duke mohuar të kenë ndonjë të dhënë, shkruan Veriu.info
Policia kishte dalë në vend të ngjarjes dhjetë minuta më vonë, kur i plagosuri ishte dërguar për në Spital të Pejës.
Plagëve të rënda që kishte marrë, s’kishte mundur t’iu rezistojë as deri në hyrje të qytetit. Kishte vdekur rrugës.
Enveri ishte i treti djalë që ishte vrarë nga familja Haradinaj. Dy djemë të tjerë të kësaj familje, Luani dhe Shkëlzeni, ishin vrarë gjatë luftës.
Për fat të keq kjo fatkeqësi e goditi familjen Haradinaj në kohën kur Ramushi dhe Dauti ishin në burg, njëri në Hagë e tjetri në Kosovë për veprimtarinë e tyre gjatë luftës.
Në varrimin e Enverit kishin marrë pjesë dhjetëra mijëra veta. Për ceremoninë e varrimit kishte ardhur nga Haga Ramush Haradinaj, i cili ishte liruar me kusht, si dhe Daut Haradinaj, i cili ishte liruar për disa orë nga burgu i Dubravës, raporton Veriu.info
Po ashtu vlen të theksohet se Ramush Haradinaj kishte falur gjakun e vëllait ditën e varrimit të të vëllait.
Sot janë bërë 18 vite nga një nga vrasjet më të bujshme të pasluftës në Kosovë, kurse vrasësi ende nuk është kapur./Veriu.info
