Zëdhënësi i PDK-së, Faton Abdullahu, ka deklaruar se lëvizja e lirë për qytetarët e Kosovës erdhi si shpërblim pas heqjes dorë nga njohja.
Ai tha se deri tani nuk është bërë liberalizimi i vizave pasi nuk është lëshuar pe në këtë aspekt.
Një kundërpërgjigje të shpejt ndaj kësaj deklarate nga kampi i PDK-së, ka bërë deputeti i Lëvizjes Vetëvendosje, Mefail Bajqinovci.
Bajqinovci tha se liberalizimi i vizave ka ardhur si rrjedhojë e një qeverisjeje demokratike dhe progresive që është pasqyruar dhe në raporte të ndryshme ndërkombëtare.
Ai tha se nën qeverisjen e PLAN, Kosova renditej në nivel të njëjtë me Sudanin e Somalinë, diçka që sipas Bajqinovcit ka ndryshuar rrënjësisht tani.
“Është evidente se liberalizimi i vizave është pasuar si rrjedhojë e një qeverisjeje demokratike dhe progresive që është pasqyruar në raporte të ndryshme vendore e ndërkombëtare.Përderisa nën qeverisjet e PLAN-it rangoheshim në nivel të njëjtë me Sudanin e Somalinë, tani po radhitemi në mesin e shteteve me përmirësimet më të mëdha për sundim të ligjit”
Deputeti i LVV-së tha se arritjet e Kosovës nën qeverisjen Kurti i kanë potencuar edhe ambasadorët e vendeve më të fuqishme të BE-së.
“Këtë arritje e kanë potencuar edhe ambasadorët e vendeve më të fuqishme në Bashkimin Evropian që janë të akredituar në vendin tonë, ai i Francës dhe Gjermanisë. Që të dy këta kanë theksuar ekskluzivisht se lufta kundër korrupsionit dhe sundimi i ligjit janë faktori vendimtar që përfundimisht do ta mundësojnë lëvizjen e lirë të qytetarëve tanë në vendet e zonës Schengen” tha Bajqinovci në një prononcim dhënë për “Gazeta Blic”
Zëdhënësi i PDK-së, Faton Abdullahu deklaroi se heqja e vizave për qytetarët e Kosovës nga Bashkimi Evropian ka qenë i lidhur me çështjen e dialogut mes Kosovës dhe Serbisë.
“Bashkësia Ndërkombëtare i ka mbajtë vizat për t’i përdorë në kuadër të asaj mëndësie të karrotës dhe kjo dihet veç. Deri më sot nuk i kemi marrë vizat, dhe nuk i kemi marrë vizat pse nuk është lëshuar pe, nuk është hequr dorë nga njohja. Sot hiqet dorë nga njohja dhe shpërblimi është vizat dhe të tundojnë edhe më shumë me Këshill të Evropës me anëtarësim në BE e të tjera sa ki me lëshu pe”, tha ai një studio televizive
