Përgjatë dy mandateve sa ka qenë kryetari i Komunës Jugore të Mitrovicës, Agim Bahtiri, ka lobuar për hapjen për qarkullim të Urës së Ibrit. I ftuar në FRONTAL të T7, ai ka folur pikërisht për ketë temë, kur sot në Asamblenë e Komunës Veriore të Mitrovicës është votuar me shumicë votash një kërkesë për hapjen e Urës për qarkullim automjetesh.
Ai ka thënë se shpreson që një gjë e tillë të ndodh dhe shton se kësaj radhe e sheh se përkushtimi për të vendosur ligjin në atë pjesë është serioz.
“Shpresojmë se do të ndodh. Lajmi që u dha nga asambleja i gëzon të gjithë qytetarët, pavarësisht nacionalitetit. Ju e dini shumë mirë që angazhimi im ka qenë gjithmonë i pranishëm si në jug edhe në veri. Lëvizja e lirë e qytetarëve duhet të jetë në nivelin e duhur.E shoh që kësaj radhe e kanë njëmend për ta vendosur ligjin, dhe ai duhet zbatuar në gjithë tërësinë e saj. Ky vendim është i mirëseardhur”, ka thënë Bahtiri në FRONTAL të T7, raporton Express.
Ai ka kujtuar edhe faktin se në 2015 kishte nënshkruar një marrëveshje për lirimin e Urës së Ibrit.
“Ju e dini se më 2015 është nënshkruar marrëveshje për t’u liruar Ura e Ibrit. Kësaj radhe nuk ka pse të mos realizohet, s’është në dëm të askujt”, ka thënë Bahtiri.
Sipas tij, Kosova ka bërë shumë për serbët edhe përkundër se si shtet është mbi 93 % shqiptarë.
“Ne i dëshirojmë ata, serbët dhe gjithë të tjerët. Është pasuri e shtetit tonë, të kemi komunitete të tjera. Ata duhet ta dinë se ma shumë nuk mundemi me bë. E kemi shpall Kosovën si shtet multi-etnik që është mbi 93 % shqiptar”, ka theksuar ai në FRONTAL.
