Pas dekadash reduktimi të numrit të ushtarëve, ushtria suedeze është duke rekrutuar ushtarë dhe duke hapur baza, ka raportuar portali “Politico”.
Stërvitja Aurora në ishullin Korse, në të cilën ushtarë të rinj u përpoqën të pushtonin ishullin nga kolegët që luanin rolin e pushtuesve, shënoi fundin e stërvitjes më të madhe ushtarake të mbajtur në Suedi që nga fundi i Luftës së Ftohtë, gjatë së cilës forcat suedeze dhe 14 aleatët u testuan nëpër male, fusha dhe arkipelag.
Në samitin e NATO-s në Lituani në korrik, Suedia shpreson të finalizojë aplikimin e saj si anëtarja e 32-të, pasi Finlanda fqinje iu bashkua aleancës në prill.
“Ne nuk duam të bashkohemi me NATO-n vetëm për mbrojtjen tonë, ne gjithashtu kemi shumë për të kontribuar,” tha kryeministri Ulf Kristerson, i cili mbërriti në Kors me varkë sulmi për të vëzhguar stërvitjen Aurora.
Pavarësisht retorikës së qeverisë, shpenzimet ushtarake të Suedisë ende nuk janë në përputhje me udhëzimet e NATO-s se shpenzimet e mbrojtjes së një vendi duhet të jenë të paktën dy për qind të bruto prodhimit të brendshëm. Në vitin 2022, Stokholmi ndau 1.3 për qind të bruto prodhimit të brendshëm për forcat e të armatosura.
Qeveria thekson se nuk pret të arrijë objektivin prej dy për qind deri në vitin 2026. Ministri suedez i Mbrojtjes Paul Jonsson i tha Politico se reduktimi i forcave të armatosura të Suedisë pas përfundimit të Luftës së Ftohtë ishte i thellë dhe se vendi i tij tani ishte në rrugën e duhur.
“Ligji i mbrojtjes që miratuam në vitin 2020 nënkuptonte një rritje të konsiderueshme të buxhetit për të gjitha shërbimet, ushtrinë, marinën dhe forcat ajrore. Pasi shpërtheu lufta në Ukrainë në shkurt 2022, ne rritëm ritmin,” vuri në dukje ai.
Neutrale në Luftën e Dytë Botërore, Suedia u shfaq si një lojtar i vlerësuar ushtarak rajonal në vitet që pasuan. Nga fundi i viteve 1950, forca e saj ajrore ishte e katërta më e madhe në botë dhe teknologjia e saj e nëndetëseve më e avancuara.
Por pas rënies së Bashkimit Sovjetik në vitin 1991, ligjvënësit suedezë vendosën që kërcënimi nga Rusia kishte marrë fund. Qeveritë në Stokholm kanë përfituar nga “dividenti i paqes” duke shkurtuar shpenzimet për armë dhe duke investuar në vend të kësaj në spitale, shkolla dhe shërbime të tjera. Buxheti i mbrojtjes i Suedisë ra nën dy përqind në vitet 2000. Ishulli strategjik Gotland në Detin Baltik është çmilitarizuar dhe rekrutimi u pezullua.
Bregdeti jugor i Suedisë është afër Kaliningradit, shtëpia e Flotës Baltike, ndërsa Gotland është afër rrugëve kryesore detare ushtarake dhe tregtare për në qytetin e dytë të Rusisë, Shën Petersburg.
Nga ana e saj, Rusia ka ashpërsuar paralajmërimet e saj ndaj Suedisë në vitet e fundit dhe tha se do t’i përgjigjet pranimit eventual të Suedisë në NATO me masa hakmarrëse ushtarako-teknike, shkruan GazetaBlic.
