Kryeministri në detyrë, Albin Kurti, pas takimit me kryetarin e Lidhjes Demokratike të Kosovës (LDK), Lumir Abdixhikun, të shoqëruar nga ish-presidentja Vjosa Osmani, u deklarua edhe për çështjen e presidentit.
Kurti foli se si e sheh Lëvizja Vetëvendosja presidentin e ardhshëm të Kosovës. Sipas tij, presidenti i ardhshëm nuk duhet të jetë i përfshirë në politikë dhe duhet të jetë figurë unitare e popullit, shkruan Insajderi.
“Lëvizja Vetëvendosje konsideron që presidenti apo presidentja e Republikës, si një figurë që duhet të ngrohë zemrat e të gjithë qytetarëve të republikës, në kuptimin e vlerave dhe meritave profesionale, pra një personalitet që do të kishte shumë karakter të mirëpritur nga popullsia, nuk do të paraqiste polin e katërt të pushtetit, sepse republika demokratike i ka tri shtylla, do të duhej të ishte jashtë partive politike dhe njëkohësisht të mos ishte i përfshirë në polemika ditore. Ne jemi të interesuar e të gatshëm që të bashkëpunojmë me LDK-në sepse vendi ynë ka nevojë për progres, mirëpo sa i përket pozitës së presidentit, qëndrimi ynë është që nuk do duhej të ishte pjesë e pushtetit politik”, deklaroi Kurti.
