Emilja Rexhepi, nga Partia e Re Demokratike (Nova Demokratska Stranka), ka deklaruar në “Info Magazinë” në Klan Kosova se përfaqësuesit e komuniteteve joshumicë do të jenë konstruktivë në procesin e formimit të institucioneve dhe se prioritet mbetet konstituimi sa më i shpejtë i tyre.
Ajo tha se renditja e konstituimit të institucioneve ka qenë e njëjtë që nga viti 2009.
Sipas saj, pavarësisht se nga cila parti politike vjen kandidati për kryeministër, ajo do ta mbështesë formimin e institucioneve.
Që nga viti 2009, renditja e konstituimit të institucioneve ka qenë e njëjtë. Fillimisht votohet kryetari i Kuvendit, më pas nënkryetarët, në mënyrë që Kuvendi të jetë plotësisht i konstituuar. Pas kësaj krijohet Qeveria dhe në fund votohet Presidenti i shtetit. Ne si përfaqësues të komuniteteve joshumicë duam të jemi konstruktivë. Pa marrë parasysh se nga cila parti politike vjen kandidati për kryeministër, nëse krijohen kushtet për formimin e institucioneve, unë do ta jap votën time që Kosova të mos stagonjë epse qytetarët presin që Kosova të ketë sa më shpejt institucione funksionale.
Rexhepi theksoi se sfida më e madhe mbetet zgjedhja e presidentit, pasi për nisjen e këtij procesi nevojitet prania e të paktën 80 deputetëve në sallë.
Çështja më sfiduese mbetet zgjedhja e Presidentit, pasi për nisjen e procesit nevojiten të paktën 80 deputetë të pranishëm në sallë. Është detyrë e të gjithë neve që sa më shpejt ta konstituojmë Kuvendin, ta formojmë Qeverinë dhe më pas ta zgjedhim Presidentin.
E pyetur se kë do ta mbështesin si komunitet për president, ajo tha se kreu i ardhshëm i shtetit duhet të jetë figurë që bashkon qytetarët.
Është e rëndësishme që president të jetë i të gjithë qytetarëve të Kosovës. Duhet të jetë një figurë që përfaqëson ndershmërinë, integritetin, kulturën dhe profesionalizmin, një person me të cilin të gjithë qytetarët mund të identifikohen. Dhe mendoj se në Kosovë ka persona të tillë. Nuk do ta mbështesim një kandidat kontrovers që cenon karakterin multietnik të Kosovës. Fillimisht duhet të përfundojë procesi i konstituimit të Kuvendit dhe formimit të Qeverisë, e më pas do të vijë në rend dite zgjedhja e Presidentit.
