Kryetari i Partisë Demokratike Turke të Kosovës (KDTP), Fikrim Damka, në një prononcim për Front Online ka deklaruar se deri më tani nuk ka pasur asnjë bisedë me kryeministrin në detyrë, Albin Kurti, lidhur me formimin e qeverisë së re, por ka shprehur bindjen se bashkëpunimi do të vazhdojë në kuadër të Qeverisë ‘’Kurti 3’’.
“Ende nuk kemi pasur asnjë bisedë me Kryeministrin në detyrë, Albin Kurti, por besojmë se do të vazhdojmë me qeverisjen Kurti 3’’, ka thënë Damka.
Damka ka bërë të ditur se dy deputetët e KDTP-së do ta mbështesin formimin e Qeverisë ‘’Kurti 3’’, si dhe procesin e votimit të presidentes së vendit.
“Dy deputetët e mi e kanë mbështetjen për Qeverinë ‘Kurti 3’ dhe për votimin e Presidentes jemi pro, për shkak se Kosova ka nevojë për stabilitet’’, ka deklaruar Damka.
Sipas Damkës, KDTP nuk ka parashtruar asnjë kërkesë shtesë apo kusht për votimin e Presidentes apo qeverisë sepse sipas tij Kosovës i duhet të ecë përpara e të formojë institucionet.
“Nuk kemi asnjë kërkesë shtesë apo kusht për votimin e Presidentes apo të qeverisë, sepse Kosova duhet të ecë përpara dhe t’i formojë institucionet’’, ka thënë Damka për Front Online.
