Në kuadër të hulumtimit për subjektet private shëndetësore që aplikojnë ofrimin e shërbimeve të botox-it dhe fillerëve pa licencë, Veriu.info ka siguruar dokumente zyrtare me të cilat dëshmohet se si qendra estetike “Helena” ka operuar pa licencë dhe ka ofruar injektimin e botox-it për klientët, edhe pse ky shërbim nuk është i lejuar në Kosovë.
Veriu.info ka siguruar një procesverbal të Inspektoratit Shëndetësor të datës 17 dhjetor 2025, ku në qendrën estetike “Helena” është realizuar një kontroll nga Inspektorati Shëndetësor në bashkëpunim me Drejtorinë e Hetimit të Krimeve Ekonomike, gjatë të cilit janë gjetur shkelje të shumta.
Sipas raportimit të inspektimit, subjekti “Helena”, me pronare Fjolla Rafuna, nuk ka poseduar licencë pune nga Ministria e Shëndetësisë.
Në “Helena” është zbuluar se punojnë persona pa licencë pune nga Ministria e Shëndetësisë; madje nuk ka fare mjek të licencuar për ofrimin e shërbimeve shëndetësore, siç është aplikimi i produkteve me mbushje me acid hialuronik (filler).
Inspektorët shëndetësorë, në bashkëpunim me policinë, kanë gjetur se në “Helena” aplikohen edhe produkte të botox-it, produkt ky që nuk është i lejuar për përdorim në Kosovë.
Për shkak të të gjeturave të shumta, në fund të inspektimit qendrës estetike “Helena”, të Fjolla Rafunës, i është vendosur shenja e ndalimit të punës deri në licencim nga Ministria e Shëndetësisë.
Pas këtij inspektimi, Inspektorati Shëndetësor ka nxjerrë vendim me të cilin “Helena” është gjobitur me 2 mijë euro.
Përkundër ndalesës së aplikimit të botox-it dhe fillerëve që e kishte pasur me procesverbal të inspektorëve të datës 17.12.2025 dhe mbetjes të të njëjtit në fuqi deri në mars 2026, qendra estetike “Helena” kishte vazhduar të prezantoj oferta për injektimin e fillerëve në muajin janar.
Në një përgjigje të dhënë nga Ministria e Shëndetësisë për Veriu.info më 5 mars, është bërë e ditur se “Helena” ka paguar gjobën, por e njëjta vazhdon të mbetet e palicencuar.
Veriu.info ka tentuar të marrë një qëndrim nga qendra estetike “Helena” për çështjet e ngritura, por nga kjo qendër i kanë thënë gazetës që mund të deklarohen vetëm përmes avokates së tyre Bedrie Rexhepi.
Pas dërgimit të pyetjeve te avokatja, e njëjta fillimisht ka kërkuar kohë për shqyrtimin e tyre dhe pas katër ditësh ka thënë: “Pas shqyrtimit të kërkesës suaj, nuk e kemi parë të arsyeshme të japim përgjigje lidhur me pyetjet e parashtruara! Duke shtuar që puna ka vazhduar sipas rekomandimeve dhe ligjit!”.
Çka është mbushja me acid hialuronik (filler)?
“Mbushja me acid hialuronik” është një procedurë estetike (jo kirurgjikale), ku në lëkurë injektohet acid hialuronik, një substancë që gjendet natyrshëm në trup dhe ndihmon në mbajtjen e lagështisë dhe volumit.
Mjeku ose profesionisti injekton këtë substancë në zona të caktuara të fytyrës ose trupit për të mbushur rrudhat, për të rritur volumin (p.sh. buzët, faqet), për të përmirësuar konturet e fytyrës dhe për të hidratuar thellësisht lëkurën.
Acidi hialuronik ka aftësi të tërheqë dhe të mbajë ujë, kështu që e bën lëkurën më të plotë dhe më të lëmuar, si dhe jep efekt të menjëhershëm.
Efekti i acidit hialuronik zgjat 6 deri në 18 muaj.
Rreziqet e acidit hialuronik, nëse aplikohet nga persona të palicencuar, janë: ënjtje, mavijosje, infeksion, deformim ose rezultate jo natyrale dhe, në raste të rralla, bllokim i enëve të gjakut.
Çka është aplikimi (injektimi) i botox-it?
Aplikimi i botox-it është një procedurë estetike ku injektohet një dozë e vogël e toksinës botulinike në muskuj të caktuar të fytyrës (ose trupit), për t’i relaksuar ata përkohësisht.
Aplikimi i botox-it kryhet me gjilpëra shumë të holla dhe injektohet në muskuj specifikë, si në: ballë, mes vetullave dhe rreth syve.
Kur aplikimi i botox-it bëhet nga persona të palicencuar, atëherë paraqiten këto rreziqe estetike dhe shëndetësore.
Rreziqet estetike: rënie e qepallës (sy “i varur”), asimetri në fytyrë, fytyrë “e ngrirë” (pa mimikë natyrale) dhe rezultate të panatyrshme.
Rreziqet mjekësore: dozë e gabuar (paralizim i tepërt i muskujve), injektim në vend të gabuar (dëmtim i nervave), infeksione dhe reaksione alergjike.
Por, në raste më të rralla paraqiten edhe këto rreziqe: vështirësi në të folur ose gëlltitje, probleme me frymëmarrjen (nëse toksina përhapet gabim) dhe përhapje e efektit në zona të tjera të trupit.
LEXONI EDHE:
