Zëdhënësi i Aleancës së Ardhmërisë së Kosovës, Kushtrim Xhemaili, ka reaguar ashpër ndaj pagave për ushtarët e Kosovës, duke i cilësuar ato si të pamjaftueshme dhe të vonuara nga qeveria aktuale.
Ani pse paga me Ligjin e ri për Forcën e Sigurisë së Kosovës (FSK) është rritur një vit më parë (2023), ku sipas rritjes ata përfitojnë 39% më shumë, pra që i bie nga paga bazë që kishin me shumë prej 443 euro, ndërsa paga bazë me ligjin e ri është 616 euro.
Në një prononcim për GazetaBlic, Xhemaili rikujtoi se Ligji i Pagave është përgatitur nga AAK-ja gjatë qeverisjes së kryetarit të kësaj partie Ramush Haradinaj, e që qeveria në pushtet vetëm e ka vonuar, e që sipas tij janë ndryshime të papranueshme.
“Së pari, duhet theksuar se Ligji i Pagave u përgatit nga Aleanca që në mandatin e qeverisë Haradinaj. Fatkeqësisht, qeveria Kurti 1 dhe 2 jo vetëm që e ka vonuar 4 vjet, por ka bërë ndryshime të papranueshme”, tha Xhemaili.
Sipas Xhemailit, “rritja e pagave”, që është ofruar prej 6.80 euro, është qesharake përballë rritjes së vazhdueshme të çmimeve në vend.“Veçanërisht shqetësuese është përjashtimi i pensioneve të veteranëve nga paga minimale – një veprim që ndodhi në koordinim me Listën Serbe.
Për më tepër, ajo që quhet “rritje e pagave” është në fakt vetëm 6.80 euro – një shumë qesharake duke pasur parasysh rritjen e vazhdueshme të çmimeve. Vlen të theksohet se paga e një rekruti është 210 euro”, u shpreh Xhemaili.
E, pagën e ushtarëve në vendit tonë e konsideron të ulët edhe ish-koloneli i FSK-së, Afrim Veseli, që sipas tij nuk është në përputhje me detyrat dhe specifikat që kanë në veprimtarinë e tyre, si dhe në sigurinë e tyre sociale.“Konsideroj që është e vogël sepse detyrat dhe specifikat e veprimtarisë së ushtrisë, gjegjësisht e pjestarëve të ushtrisë së Kosovës janë shumë më specifike dhe më të rënda, andaj edhe niveli i kësaj page është i pamjaftueshëm për sigurinë e tyre sociale, duke pasë parasysh edhe situatën ekonomike dhe ngritjen e çmimeve që i kemi pas në kohën e fundit në Kosovë. Konsideroj që është mjaft e vogël kjo pagë që ata marrin”, vlerësoi Veseli në një prononcim për GazetaBlic.
Paga me Ligjin e Ri për FSK-në (2023)
Ndër të tjera, zëdhënësi i AAK-së, premtoi në emër të partisë se do të rrisin gjendjen financiare të personelit të FSK-së, që sipas tij paga më e ulët do të jetë rreth 1000 euro.
“Ne do të rrisim ndjeshëm gjendjen financiare të personelit të FSK-së, duke garantuar që paga më e ulët në FSK të jetë rreth 1000 euro. Gjithashtu, duke njohur sakrificat e veteranëve tanë, do të prezantojmë legjislacion që u lejon atyre të punojnë pa cenuar pensionet e tyre. Kjo përfshin edhe veteranët e FSK-së dhe Policisë”, deklaroi ai.
Gjithashtu, tha se AAK-ja do të angazhohet fuqishëm për përforcimin e FSK-së, si dhe do t’a rrisin buxhëtin e mbrojtjes, do të modernizojmë infrastrukturën ushtarake, do të zgjerojmë programet e trajnimit dhe do të investojmë në pajisje moderne.
