Deputeti Eman Rrahmani të martën në mëngjes në një konferencë për media ka konfirmuar se ka braktisur Vetëvendosjen bashkë me Visar Korenicën, për të krijuar koalicion me Aleancën Kosova e Re dhe Partinë e Drejtësisë, të cilin e kanë titulluar “Lista për Familjen”.
Gjatë prezantimit të këtij koalicioni në mesin e tyre është parë edhe Armend Agolli, i cili në zgjedhjet lokale të vitit 2021 ishte kandidat i LDK-së për kryetar të Mitrovicës.
Më 28 korrik të vitit 2021 kishte thënë se me shumë vullnet dhe kënaqësi i ishte përgjigjur thirrjes së LDK-së për të kandiduar për kryetar të Komunës së Mitrovicës dhe për t’i prirë listës garues të kandidatëve të kësaj partie në Kuvendin Komunal.
Ai kishte thënë se nuk do të premtonte gjëra që nuk do të mund t’i arrinte.
Ishte arsyetuar se “jam rritur dhe edukuar mbi parimet tradicionale shqiptare, por edhe religjioze, sipas të cilave s’mund të flas e as të premtoj gjëra që s’mund t’i arrijë”.
Mirëpo vetëm një muaj pasi kishte pësuar humbje në zgjedhjet lokale, të cilat i fitoi kandidati i PDK-së, Bedri Hamza, Agolli ishte përjashtuar nga LDK-ja nën akuzat se kishte bashkëpunuar me PDK-në.
Ai i duke iu kundërpërgjigjur vendimit për përjashtim, kishte deklaruar se partia ishte trefishuar në lokalet e fundit në Mitrovicë dhe thekson se këtë e kishte parë si sinjal të “shkëputjes nga mendësia e vjetër”, që sipas Agollit është përgjegjëse për rënien e LDK-së atje. Megjithatë ai thotë se kishte gabuar në analizë.
“Mirëpo zhvillimet e fundit ne dege e deshmuan se e kishim gabim, dhe se ketu ka ende te atille qe mendojne vetem per veten dhe per interesat personale. Te tilleve po u them edhe njehere, shkurt-e-shqip: LDK as nuk ka qene, as nuk eshte, dhe as nuk do te jete kurre as monarki, dhe as parti private. LDK ka qene, eshte dhe do te mbetet parti e vlerave, parti institucionale, parti e parimeve dhe si e tille, nje parti qe njerezit i bashkon brenda vetes duke i respektuar interesat e tyre te perbashket shoqëror”, kishte shkruar Agolli para tre vjetësh.
Ai u kishte bërë thirrje atyre që nuk e shohin LDK-në si parti të vlerave insitucionaliste të lëshojnë rrugë.
“Te gjithe ata qe LDK’ne nuk e shohin dhe nuk e perjetojne si te tille, eshte koha e fundit te leshojne rruge. Ose, do te mbesin pa rruge. As “monarket” brenda Deges se LDK’se ne Mitrovice sigurisht se nuk perbejne perjashtim ne kete drejtim”, kishte shkruar Agolli.
Në arsyetimin e degës së LDK-së në Mitrovicë thuhej se Agolli është përjashtuar pasi pas përfundimit të zgjedhjeve lokale ka vepruar në kundërshtim me interesat e partisë.
“Kryesia e degës së Lidhjes Demokratike të Kosoves në Mitrovicë në mbledhjen e mbajtur sot, me votë unanime, ka përjashtuar nga grupi parlamentar dhe funksionet tjera të partisë , Armend Agollin dhe Xhyljeta Morina Imeri. Të lartpërmendurit që nga mbarimi i procesit të zgjedhjeve lokale kanë vepruar në kundërshtim me të gjitha qëndrimet e partisë, duke bashkëpunuar me partitë tjera në kundërshtim me interesat e LDK-së, duke mbi votuar vendimet e LDK-së me votat e PDK-së”, thuhej në njoftimin e degës së LDK-së.
