Kryetari i Lidhjes Demokratike të Kosovës (LDK), Lumir Abdixhiku, ka reaguar pas përfundimit të takimit të liderëve të partive politike, të thirrur nga kryetari i Lëvizjes Vetëvendosje (LVV), Albin Kurti, për të diskutuar rreth zhbllokimit të situatës politike dhe konstituimit të Kuvendit, shkruan Gazeta Sinjali.
Abdixhiku ka thënë se ky takim ishte “një farsë publike” dhe nuk ka prodhuar asnjë rezultat konkret.
“Nuk ka pasur asnjë ndryshim qëndrimi nga Lëvizja Vetëvendosje. Kjo është një farsë publike e inskenuar për të krijuar përshtypjen e një vullneti që në fakt mungon”, deklaroi Abdixhiku për media pas takimit.
Ai shtoi se vendi vazhdon të jetë në një krizë institucionale të thellë, ndërsa theksoi se përgjegjësia bie mbi partinë në pushtet.
“Fatkeqësisht, Kosova mbetet në krizë. Nevojitet vullnet i sinqertë politik për ta zgjidhur situatën, jo takime për konsum publik,” theksoi ai.
