Kryetari i Lidhjes Demokratike të Kosovës, Lumir Abdixhiku, ka kritikuar ashpër qeverisjen e Lëvizjes Vetëvendosje, duke e akuzuar për gjashtë vite rezultate “katastrofike”, rritje të çmimeve dhe fatura gjithnjë e më të shtrenjta të energjisë.
Në një deklarim publik, Abdixhiku tha se qytetarët po përballen me çmime të larta, të cilat sipas tij, po shkaktohen nga përfitimet milionëshe të biznesmenit Vuk Hamoviq nga importi i energjisë elektrike.
“Atje Vuk Hamoviçi po përfiton miliona pare të Kosovës prej importit të energjisë elektrike, të cilën këta tentojnë me e fshehë. Edhe dje, edhe sot nga 300 deri në 400 mijë euro në ditë po fitohen. Ky është patriotizmi i tyre fals”, deklaroi ai.
Kreu i LDK-së theksoi se fatin e Kosovës nuk duhet t’u lihet, siç tha ai, atyre që kërkojnë të rrënojnë shtyllat identitare të shtetit. Sipas tij, qytetarët dhe partitë e tjera politike po presin një drejtim të ri nga LDK-ja.
“Populli pret prej LDK-së. Partitë tjera po presin prej LDK-së. Nuk ka parti në Kosovë që s’thotë ‘duam me LDK-në’. Edhe elektorati i tyre po thotë të njëjtën gjë. Nëse po doni kaq shumë me LDK-në, votojeni LDK-në”, tha Abdixhiku.
Duke iu referuar Vetëvendosjes, ai u shpreh se VV përdor fyerje për propagandë, por në prapaskenë, sipas tij, kërkon marrëveshje politike me LDK-në.
“Në publik na akuzojnë se po duam me kthy Serbinë në Kosovë. Kjo është gjuha e tyre e vetme për vitet 2025-2026. Por posa mbaron dita e propagandës, në mbrëmje thonë: ‘hajde LDK-ja me u bë me neve bashkë’”, tha ai.
Abdixhiku i bëri thirrje qytetarëve të votojnë LDK-në në zgjedhjet e 28 dhjetorit, për siç tha, “t’i dhënë fund kësaj qeverisjeje”.
