Kryetari i Trepçës ’89 ka shpjeguar një detaj shokues nga një takim që janë përpjekur ta bëjnë dje në FFK. Punëtori i federatës sipas tij i ka ofenduar rëndë, duke i krahasuar me presidentin serb Aleksandar Vuciq.
Kryetari i Trepçës ’89 ka treguar një prapaskenë vërtet të hidhur nga takimi i djeshëm që janë munduar ta organizojnë disa klube në selinë e FFK-së, edhe pse derën e saj e gjetën të mbyllur.
“Ne kemi shkuar te selia e FFK-së si klube për të biseduar, Remzi Ejupi e ka organizu”, shtoi ai.
“Aty e kemi gjetur vetëm një punëtor të federatës, të cilit Ejupi i kërkoi të na e bënte një fotografi neve që ishim aty. Ai na tha ma përpara e fotografoj Vuciqin se juve”, tha ai për emisionin “Kampionët”.
Çfarë ndodhi dje?
Dje, rreth 10 klube të futbollit, shumica nga Superliga, e gjetën të mbyllur derën e selisë së Federatës së Futbollit të Kosovës kur shkuan të shtunën në mesditë për të diskutuar për telashet me të cilat po përballet futbolli në vend.
Gazeta Nacionale merr vesh nga burime të veta brenda klubeve se ato nuk i pritën në takim as nga presidenti i FFK-së Agim Ademi e as nga ndonjë zyrtar tjetër.
Krejt ky mobilizim i skuadrave kosovare vjen pasi FFK nuk plotësoi kushtet që klubet e saj të përfitojnë nga ligji për sponsorizim nga Ministria e Kulturës, Rinisë dhe Sportit të Kosovës(MKRS).
Ende nuk dihet nëse shtëpia e futbollit të Kosovës do të arrijë të plotësojë kushtet për t’u licencuar si federatë në radhë të parë, kjo për shkak se numri një i FFK-së, Agim Ademi është në rigjykim, dhe se Komisioni për Licencim i ka dërguar vërejtjet e saj për këtë pjesë.
Se ligji për sponsorizim është i rëndësishëm fillimisht për ekzistencën e klubeve, tregon pjesëmarrja e madhe e skuadrave nga Superliga e Liga e parë dje në takim për diskutim, ku në një lokal ishin mbledhur rreth 20 klube.
