Në Odën Ekonomike të Kosovës janë mbajtur zgjedhjet për Shoqatën e Derivateve të Naftës, ku kryetare është zgjedhur Adelina Asllani nga HiB Petrol.
Kryetari i Odës Ekonomike të Kosovës, Lulzim Rafuna, i uroi Adelina Asllanit suksese në përfaqësimin e interesave të anëtarëve të shoqatës, me theks të veçantë në avokimin dhe mbrojtjen e këtij sektori të rëndësishëm.
Ai theksoi se sektori i derivateve të naftës ka një rol kyç në ekonominë e vendit dhe në jetën e qytetarëve.
“Sfidat gjeopolitike që lidhen me furnizimin dhe rrjedhën e derivateve kërkojnë një përfaqësim të denjë dhe të fuqishëm, në mënyrë që të përballohen me sa më pak pasoja për ekonominë e Kosovës”, theksoi Rafuna.
Ai shtoi se Oda Ekonomike e Kosovës do të vazhdojë të mbështesë këtë shoqatë në avokimin dhe mbrojtjen e interesave të sektorit.
Me këtë rast, Rafuna shprehu mirënjohje për ish-kryetarin, Fadil Berjani, për kontributin dhe angazhimin e tij të çmuar në avancimin e interesave të këtij sektori.
