Situata e vërshimeve në Republikën e Kosovës ka shënuar përmirësim të dukshëm pas ndërprerjes së reshjeve të shiut dhe fillimit të reshjeve të borës.
Sipas të dhënave zyrtare nga Qendrat Operative Emergjente 112 dhe njësitë operative në terren, niveli i ujit në lumenjtë kryesorë ka filluar të bie dhe aktualisht nuk paraqitet rrezik i menjëhershëm për vërshime të reja, shkruan IndeksOnline.
“Në Prishtinë dhe rrethinë, janë raportuar vërshime të lokalizuara në disa nënkalime dhe bllokime të rrugëve dytësore, por situata mbetet e menaxhueshme.
Në Prizren, gjatë natës janë shënuar shumë pak intervenime, kryesisht të natyrës teknike.
Në Mitrovicë, gjendja është kryesisht e qetë, ndërsa në Mitrovicën e Jugut disa familje janë evakuuar përkohësisht si masë sigurie.
Në rajonin e Pejës, janë raportuar dy intervenime në Istog, përfshirë evakuimin e një familjeje, ndërsa komunat e tjera paraqesin gjendje stabile.
Në Gjakovë dhe Gjilan, situata është e qetë dhe nën kontroll, me rënie të vazhdueshme të nivelit të ujit në lumenj”, thuhet në njoftim.
Njësitë Profesionale të Zjarrfikjes dhe Shpëtimit në të gjithë vendin mbeten të mobilizuara për t’u ardhur në ndihmë qytetarëve, ndërsa Sistemi i Komunikimit Emergjent 112 është në monitorim dhe koordinim të vazhdueshëm të situatës 24 orë në ditë.
Autoritetet paralajmërojnë se reshjet e borës dhe ngricat kanë shkaktuar vështirësi në qarkullimin rrugor në disa zona, ndërsa disa rrugë vazhdojnë të jenë të bllokuara për shkak të shembjeve të dheut. Qytetarët apelohet të tregojnë kujdes të shtuar gjatë lëvizjes.
Agjencia e Menaxhimit Emergjent, përveç reagimit me forca operative në gjithë vendin, ka mbështetur KEK-un dhe KOSTT-in me pompa thithëse me kapacitet të lartë për largimin e ujit nga objektet e prekura, të cilat vazhdojnë të jenë në funksion sipas nevojës.
Institucionet përgjegjëse mbeten në gatishmëri të plotë për reagim dhe koordinim, ndërsa situata vazhdon të monitorohet në mënyrë të pandërprerë nga sistemi emergjent 112.
