Në seancën 16.04.2021 të Kuvendit Komunal të Vushtrrisë, disa bizneseve iu ishte dhënë në shfrytëzim afatgjatë prona e paluajtshme komunale në Parkun Industrial në Lumadh.
Pjesë e seancës së Kuvendit Komunal ishte edhe asamblisti i atëhershëm dhe i tanishëm nga radhët e PDK-së, Ilmi Azemi dhe ish asamblisti Fitim Halili. Që të dy këta asamblist i mundësuan ish kryetarit Xhafer Tahiri që vinte nga LDK mbajtjen e mbledhjes së Kuvendit Komunal, duke ia siguruar kuorumin me pjesëmarrjen e tyre thuhet në shkresën e Agjencionit Kundër Korrupsion drejtuar komunës së Vushtrrisë me datë 24.03.2022. Kjo ngase në seancën morën pjesë vetëm 18 nga 35 asamblistë sa ka Kuvendi Komunal i Vushtrrisë, dhe mospjesëmarrja e tyre në seancë do të pamundësonte kuorumin, pasi që do të kishte vetëm 16 asamblistë, raporton Veriu.info
Agjencia Kundër Korrupsionit në shkresën drejtuar Kryesueses së Kuvendit Komunal të Vushtrrisë, konstaton se ka pasur konflikt interesi në dhënien e pronave të paluajtshme komunale në shfrytëzim në seancën e vitit të kaluar, pasi që Ilmi Azemi dhe Fitim Halili nuk është dashur të jenë pjesë e seancës për shkak të konfliktit të interesi, sepse përfitues i pronës komunale ishte “Mateo Company Sh.P.K.” me pronare Fllanza Sadiku Azemi, e cila është bashkëshortja e djalit të vëllait të asamblistit Ilmi Azemi, si dhe përfituese ishte edhe kompania e “Bina Sh.P.K.” me pronare Nurije Halili, e cila është bashkëshortja e ish asamblistit Fitim Halili, i cili së bashku me Ilmi Azemi mundësuan kuorumin e Kuvendit Komunal për dhënien e këtyre pronave të shfrytëzim afatgjatë.
Dyshimet për dallavere nuk përfundojnë me kaq, pasi që asamblisti Ilmi Azemi në këtë proces të dhënies së pronave për këto biznese (përfshirë biznesin e bashkëshortes së vëllaut), ishte i involvuar edhe më herët. Kjo pasi që ai ishte pjesë e Komisionit Komunal për Vlerësimin e Ofertave dhe për zbatimin e procedurave për dhënien e tyre në shfrytëzim afatgjatë.
Ndryshe, në maj të vitit 2019 ish kryetari i Vushtrrisë, Xhafer Tahiri, kishte mbajtur një konferencë ekonomike të diasporës, ku kishte shpalosur mundësitë për investime në Vushtrri, me ç’rast aty kishte prezantuar Parkun e Biznesit në fshati Lum i Madh, duke e cilësuar si projektin më madhor i qeverisjes së tij.
Veriu.info mëson se në këtë seancë të dhënies së pronave të paluajtshme komunale në shfrytëzim afatgjatë, përveç Ilmi Azemit dhe Fitim Halilit, nuk mori pjesë asnjë asamblist tjetër i PDK-së, për shkak se Kryesia e Degës e kësaj partie, asokohe opozitare, nuk ishte e pajtimit me gjithë këtë proces të udhëhequr nga qeverisja komunale e LDK-së, të cilët ndihmoheshin pa miratim të partisë së tyre edhe nga këta dy asamblistë të PDK-së.
Mirëpo, tash komuna e Vushtrrisë që udhëhiqet nga kryetari Ferit Idrizi është në hall të madh me këtë park të biznesit, i cili në qeverisjen e kaluar ishte parë si promotor i hapjes së vendeve të reja në Vushrri.
Në opinionin e Agjencisë Kundër Korrupsionit që i ka dërguar komunës së Vushtrrisë më datë 24.03.2022, i kërkohet Kryesueses së Kuvendit Komunal të Vushtrrisë, inicimin e procedurës për rishqyrtimin e vendimit nr.81/21 për dhënien në shfrytëzim afatgjatë me kompensim të pronës së paluajtshme në Lum të madh.
Po ashtu AKK në shkresë ka cituar edhe nenin 23 pika 1.13 të Ligjit për parandalimin e konfliktit të interesit ku shprehimisht thuhet se: “Agjencia i kërkon rishqyrtimin, revokimin dhe/ose shfruqizimin e aktit të nxjerrë në konflikt të interesit organit që e ka nxjerrë atë. Që nga momenti kur Agjencia kërkon rishqyrtimin e vendimit, çdo veprim për zbatimin e tij pezullohet deri në momentin kur organi vendos për vlefshmërinë e vendimit.
AKK ka paralajmëruar komunën e Vushtrrisë së duhet të njoftohet për vendimin e ndërmarrë për zbatimin e këtij opinioni.
Veriu.info kishte raportuar në janar të vitit 2022 se Njësia e Krimeve Ekonomike e Policisë së Kosovës po heton kontratat e dhënies në shfrytëzim të pronave komunale në qeverisjen e Xhafer Tahirit në Parkun Industrial në Lumadh, për shkak të dyshimit të keqpërdorimit nga bizneset dhe zyrtarët komunal me kontratat e këtyre pronave./Veriu.info
