Asociacioni i Gazetarëve të Kosovës (AGK) ka reaguar ashpër ndaj qasjes së kryeministrit në detyrë, Albin Kurti, pas publikimit të raportit të “Reporterëve pa Kufij”, ku Kosova u rendit në vendin e 99-të sa i përket lirisë së shtypit, shkruan Gazeta Sinjali.
Në reagimin e saj, AGK shprehu zhgënjim për deklaratat e Kurtit në një tubim të partisë së tij, ku ai, sipas tyre, dështoi të adresojë gjetjet e raportit dhe në vend të kësaj, fajësoi gazetarët dhe mediat për rezultatin e dobët.
”Kurti ka ofruar ‘trajnime dhe kurse nga Qeveria për gazetarë dhe media’, që është një përpjekje serioze e e papranueshme për ndikim qeveritar në punën e tyre, dhe tendencë për të vënë në pikëpyetje profesionalizimin e mediave kosovare”, thuhet në reagim.
AGK gjithashtu kritikoi Kurtin për mosadresimin e çështjeve kyçe që kanë ndikuar në lirinë e mediave në vend, përfshirë miratimin e ligjit të kontestuar për Komisionin e Pavarur të Medieve, ndikimin politik në RTK dhe retorikën e zyrtarëve qeveritarë ndaj gazetarëve.
“Kryeministri në detyrë Kurti nuk ka përmendur miratimin e ligjit anti-kushtetues për Komisionin e Pavarur të Medieve, ndikimin politik të partisë së tij në Transmetuesin Publik, RTK dhe as fushatën e vazhdueshme të përdorimit të gjuhës nxitëse dhe të urrejtjes ndaj gazetarëve dhe mediave, nga zyrtarë të partisë së tij”, theksoi AGK.
