Një tjetër incident shqetësues ndaj zyrtarëve policorë ka ndodhur sot paradite në Prizren, ku një qytetar ka humbur kontrollin dhe ka ushtruar dhunë ndaj një zyrtari të rendit.
Burimet e Gazetës Sinjali brenda Prokurorisë bëjnë me dije se rasti ka ndodhur rreth orës 10:00 në rrugën “Shaip Spahiu”, përballë Bankës Ekonomike, ku patrulla policore me biçikleta kishte ndërhyrë për një veturë të parkuar në mënyrë të parregullt. Vetura mbante targa të Shqipërisë.
Në momentin kur policët kanë nisur procedurën, nga banka ka dalë vozitësi – Sh. Rr, 59-vjeçar, i cili ka reaguar ashpër ndaj tyre. Fillimisht me sjellje agresive dhe kërcënime verbale, e më pas me një veprim të drejtpërdrejtë fizik, duke shtyrë njërin nga zyrtarët policorë.
Pas ndërhyrjes së menjëhershme, i dyshuari është arrestuar dhe dërguar në stacion policor, ku ndaj tij tashmë është iniciuar rasti “Sulm ndaj personit zyrtar”.
Hetimet janë ndërmarrë nga njësia për hetime rajonale, ndërsa me urdhër të Prokurorit të Shtetit, i dyshuari është ndaluar për 48 orë.
