Kryeministri në detyrë, Albin Kurti, mbrëmjen e së mërkurës njoftoi se qeveria në detyrë do të ndajë nga 100 euro për fëmijë dhe pensionistë.
Këtë vendim, ai e mori në kohë fushate dhe pak ditë para mbajtjes së zgjedhjeve të parakohshme të 28 dhjetorit.
Gazetari Vehbi Kajtazi, vendimin e Kurtit e cilësoi si keqpërdorim të buxhetit të Republikës.
“Me taksa të qytetarëve, ky blen vota. Vitin e kaluar ka qenë situatë tjetër. Sot nuk kemi buxhet të miratuar. Le të më tregojë se ku i mori këto para, nga cila linjë buxhetore. Uroj dhe shpresoj shumë që Prokuroria Speciale, edhe duke u bazuar në një aktgjykim të Gjykatës Supreme, do të kujdeset që këta njerëz t’i çojë në burg. Këta keqpërdorues të buxhetit të Kosovës me i çu në burg. Tani dikush mund të thotë se çka ke ti kundër që po ndan para për fëmijë dhe pensionistë”, deklaroi Kajtazi, duke shtuar se njerëzit duhet ta kenë një gjë të qartë: “a po duam të kemi shtet, apo të kemi një Robin Hood aty që diku grabit para, e diku i shpërndan ato para”.
“Ky është duke i goditur themelet e shtetit”, potencoi gazetari Kajtazi në Rubikon të Klan Kosovës.
