Kryetari i BDI-së, dhe njëri prej themeluesve të UÇK-së, Ali Ahmeti, ka marrë pjesë sot në homazhe dhe në Akademi përkujtimore në Vushtrri në një vjetorin e vdekjes së ish komandantit të UÇK-së, Gani Imeri.
Ahmeti ka thënë se emri dhe heroizmi i Gani Imerit ishte ishte mishërim i trimërisë, i pathyeshmërisë dhe i dashurisë së pakusht për Atdheun, transmeton Veriu.info.
Postimi i Ali Ahmeti:
Sot, me homazhe pranë vendprehjes dhe përmes një Akademie përkujtimore të mbajtur në Qendrën e Kulturës “Hasan Prishtina” në Vushtrri, u nderua me krenari dhe mirënjohje të thellë jeta dhe vepra heroike e një prej bijve më të lavdishëm të kombit, komandantit të Ushtrisë Çlirimtare të Kosovës, Gani Imeri.
Të pranishëm në këtë akademi përkujtimore ishin përfaqësues institucionalë, bashkëluftëtarë të lirisë, familjarë, të rinj e të moshuar, të gjithë me zemrën plot nderim për një burrë që ia kushtoi jetën lirisë së popullit të vet. Komandant Gani Imeri ishte mishërim i trimërisë, i pathyeshmërisë dhe i dashurisë së pakusht për Atdheun.
Emri dhe heroizmi i tij do të mbesin përherë të skalitura në kujtesën kombëtare dhe në rrugëtimin tonë drejt forcimit të lirisë dhe dinjitetit kombëtar.
Lavdi e përjetshme Komandant Gani Imerit dhe të gjithë dëshmorëve të kombit!
