Ambasada e Kosovës në Francë u ka bërë thirrje qytetarëve kosovarë që jetojnë në këtë shtet të ndjekin me kujdes procedurat e përcaktuara për votimin me postë në kuadër të zgjedhjeve të parakohshme për Kuvendin e Kosovës.
Përmes një njoftimi publik, ambasada ka sqaruar se zarfet me fletëvotime nuk duhet të dërgohen në adresën e saj, por në adresën zyrtare të caktuar nga Komisioni Qendror i Zgjedhjeve (KQZ) për pranimin e votave nga diaspora.
Sipas njoftimit, të gjithë votuesit që kanë zgjedhur të votojnë me postë duhet t’i dërgojnë zarfet në kutinë postare të KQZ-së në Paris, në mënyrë që votat e tyre të pranohen dhe të procedohen sipas rregullave zgjedhore.
Ambasada ka rikujtuar gjithashtu se afati për dërgimin e votave me postë është i hapur nga 21 maji dhe përfundon më 6 qershor 2026.
Autoritetet diplomatike kanë ftuar bashkatdhetarët që të sigurohen se po përdorin adresën e saktë të përcaktuar nga KQZ-ja, me qëllim shmangien e vonesave ose problemeve në procesin e votimit.
Ky njoftim vjen në kuadër të përpjekjeve për të garantuar një proces sa më të rregullt dhe të suksesshëm të votimit të qytetarëve të Kosovës që jetojnë jashtë vendit.
