Stafi jo i nevojshëm i ambasadës amerikane në Bagdad është larguar nga Iraku shkaku i rrezikut të sigurisë.
Zyrtarët në kushte anonimiteti nuk kanë treguar saktësisht se çfarë e ka shtyrë SHBA-në drejt këtij vendimi, por besohet se Izraeli është gati të nis një operacion në Iran.
Kjo është pjesa kryesore e arsyes se përse amerikanët janë këshilluar që të largohen nga rajoni, kanë thënë këta zyrtarë për BBC-në, duke shtuar se Irani mund të sulmojë edhe objekte amerikane në Irak. Zyrtarët amerikanë gjithashtu kanë kufizuar lëvizjet edhe brenda Izraelit.
Vendimi ka ardhur vetëm pak ditë pasi bisedimet amerikane për programin bërthamor të Iranit kanë ngecur.
Përfaqësuesi i lartë amerikan në Lindjen e Mesme, Steve Witkoff ende planifikon të ketë biseda të reja me Iranin.
Ai të dielën pritet të takohet me ministrin e Jashtëm iranian, Abbas Araghchi.
“Ne vazhdimisht vlerësojmë personelin e nevojshëm nëpër krejt ambasadat tona”, ka thënë një zyrtar i Departamentit amerikan të Shtetit.
“Bazuar në analizat tona të fundit, vendosëm që të reduktojmë stafin e misionit tonë në Irak”, ka thënë ky zyrtar në kushte anonimiteti.
Departamenti më vonë ka bërë të ditur se ka kufizuar lëvizjet e stafit amerikan brenda Izraelit sidomos në zonat e Tel Avivit, Jerusalemit dhe Be’er Sheva, shkaku i tensioneve në rritje në rajon.
Presidenti Donald Trump ka thënë para gazetarëve të mërkurën në mbrëmje se amerikanët janë këshilluar që të largohen nga rajoni “sepse mund të jetë vend i rrezikshëm dhe do të shohim se çfarë do të ndodhë”.
