Njohësi i zhvillimeve politike në vend, Arton Demhasaj në një prononcim dhënë për “Gazeta Blic” u shpreh kundër idesë së kryetarit të AAK-së, Ramush Haradinaj që Qeveria të shkojë në votbesim.
Demhasaj u shpreh se tashmë nuk është momenti për një veprim të tillë kur veriu i vendit është në “flakë”.
“Mendoj se nuk është momenti për një mocion mosbesimi sepse në një situatë ku veriu në njëfarë mënyre është në “flakë” situata është shumë e acaruar atje. Nuk besoj që vendi ishte dasht të mbetet pa Qeveri ose me një qeveri në detyrë”, ka theksuar ai.
Ai tha se opozita nuk i ka votat e nevojshme për me errëzu qeverinë.
“Për mua mendoj se është pak e ngutur si kërkesë me iniciu mocionin e mosbesimit shtoja kësaj edhe arsyen që opozita në një mënyrë nuk ka vota për me e rrëzu Qeverinë por ndoshta qëllimi i mocionit mund të jetë vetëm me testu, me pa se sa është përkrahja e Qeverisë momentalisht”, tha Demhasaj për “Gazeta Blic”.
Një mendim të njëjtë ndan edhe profesori universitar, Fadil Maloku.
Maloku tha se në në këto momente, vendit i nevojitet një unitet në qëndrime përballë Serbisë.
“Unë mendoj se në këtë kohë na nevojitet një unitet në kuptimin joideologjik por në kuptimin e qëndrimevepërballë Serbisë e cila në fakt është duke përdorur të gjitha mjetet për të arritur qëllimet e saj për të krijuar një lloj autonomie e që në fazat e ardhshme do të jetë një element shumë kërcënues si për shtetësinë e Koosvës po ashtu edhe për interesat kombëtare të shqiptarëve në Ballkanin Perëndimor” deklaroi Maloku për “Gazeta Blic”
Se nuk është momenti për rrëzimin e qeverisë po e thotë edhe profesori nga Mitrovica, Nexhmedin Spahiu.
Ai tha se nuk është në interes të opozitës të bëjë diçka të tillë.
“Nuk është momenti madje nuk është edhe interesi i opoizitës që ta bëjë këtë. Opozita nuk i ka votat e mjaftueshme për me e rrëzu qeverinë” tha Spahiu për “Gazeta Blic”
Kryetari i AAK-së, Ramush Haradinaj, dje ka kërkuar mocion mosbesimi ndaj Qeverisë Kurti.
Haradinaj pohoi se situata është më e rëndë, duke shtuar se përgjegjës është vet kryeministri Albin Kurti.
Haradinaj, tha se zgjidhja e vetme për këtë është nisja e mocionit të mosbesimit për Qeverinë Kurti, ngase ai ka shkuar në ekstrem.
“Qëndrimi i Aleancës është që të iniciohet mocion mosbesimi për Kryeministrin Kurti. Mocioni bazohet në dy zhvillimet e fundit, i pari është rrezikimi i sovranitet dhe i sigurisë në veri dhe i dyti është prishja e marrëdhënieve me ShBA dhe BE. Do të fillojmë diskutimet me spektrin politik me shoqërinë në përgjithësi. Besoj që mocioni është zgjidhje për këtë situata të krijuar. Kryeministri Kurti në vend që të bashkëpunoj me ShBA, ka bërë një plan të vetin, nuk ka bashkëpunuar me Amerikën po ka nxit një konflikt në veri që i konvenon Serbisë dhe Rusisë”.
“Ajo që e bënë këtë situatë shumë të keqe është pafytyrësia e Kurtit që në emër të Kosovës t’i drejtohet përmes mediave sekretarit amerikan. Kurti ka shkuar në ekstrem me garantin tonë të sigurisë. Jemi falënderues Policisë së Kosovës. Kemi filluar komunikimin e ndërsjellët me grupet parlamentare. Nuk besoj që është çështje pozitë opozitë”, tha Haradinaj.
/Gazeta Blic/
