Shtetet e Bashkuara të Amerikës dhe Irani kanë sinjalizuar se do të preferonin që të mos ktheheshin në luftën që është ndërprerë me armëpushimin e 8 prillit.
Asnjëra palë nuk është tërhequr në fushëbetejë, ani pse nuk ka pasur shkëmbim që do t’i jepte fund bisedimeve të ndërmjetësuara nga Pakistani, Katari dhe shtete të tjera, shkruan BBC në një analizë për krizën në Lindjen e Mesme.
Luftanijet e fuqishme amerikane dhe forcat ajrore po qëndrojnë brenda rrezes nga mund të goditet Irani.
Është e sigurt të hamendësohet se regjimi iranian do të ketë mbajtur forcat në gjendje gatishmërie dhe se do të përdor armëpushimin për rigrupim dhe riparim të dëmeve të shkaktuara nga sulmet e SHBA-së e Izraelit.
Tensioni i armatosur në rajon dhe përreth Gjirit hap rrezikun që të dypalët të bëjnë keqllogari dhe të kenë keqkuptime.
SHBA-ja po bën përpjekje presioni ndaj regjimit në Teheran që të bëjë lëshime duke demonstruar se janë të afërt dhe të gatshëm për të shkaktuar dëme.
Iranianët po ia përkujtojnë SHBA-së se gatishmëria e tyre për të rezistuar ende nuk është shuar dhe nëse është e nevojshme do të sulmojnë bazat amerikane dhe infrastrukturën e gjerë në gjirin arab.
Deklarata e Izraelit se bombarduesit do të kthehen në Bejrut, vetëm sa i ka ngushtuar opsionet e Trumpit.
Kryeministri izraelit, Benjamin Netanyahu nuk do të shqetësohej nëse ofensiva e tij e re në Liban do ta vështirësonte edhe më shumë marrëveshjen amerikane me Iranin. Ai nuk e donte armëpushimin me regjimin iranian. Sa i përket Netanyahut, çdo marrëveshje mes Amerikës dhe Iranit është e keqe.
Ndërkaq, iranianët vazhdojnë të përkrahin Hezobllahun, aleatin dhe satelitin e tyre në Liban.
Ata kanë paralajmëruar se marrëveshja e gjerë me SHBA-në do të duhet të përfshijë edhe fundin e ofensivës së Izraelit. Trumpi, tani për tani, po bën përpjekje që ta ndalë edhe Izraelin.
Sa i përket Ngushticës së Hormuzit, regjimi iranian do të kërkonte një çmim, ndoshta në formën e lehtësimit të sanksioneve ose shkrirjen e aseteve për ta hapur Ngushticën. Kjo duket si parakusht për bisedimet serioze.
