Projekti i Akomodimit Arafat, i vendosur 20 km në juglindje të Mekës, në Arabinë Saudite, është projektuar për të plotësuar nevojat e pelegrinëve gjatë një pjese të rëndësishme të ritualit të tyre. Projekti bashkon arkitekturën tradicionale islame me qëndrueshmërinë moderne, duke krijuar një hapësirë funksionale dhe inspiruese.
Projekti është bërë vitin që lëmë pas, nga arkitektët nga Kosova, Besnik Nurçaj, Elion Ismajli dhe Leontina Cena.
Dizajni është i frymëzuar nga tipologjia tradicionale e shtëpive me oborr të brendshëm, duke nxitur ndjenjën e komunitetit dhe qetësisë. Struktura është e ndërtuar përreth oborreve të brendshme, ku kubet modulare krijojnë fasada dinamike të cilat mundësojnë ventilimin natyral përmes hapësirave të gjelbërta. Përfshirja e elementeve ujore dhe hapësirave të hijezuara ndihmon në zbutjen e klimës së ashpër, duke u ofruar pelegrinëve freskinë dhe komoditetin e nevojshëm.
Projekti përdor kuboide modulare të ndërtuara nga materialet si betoni me ngjyrë dhe xhami, të cilët janë zgjedhur me kujdes për t’u përshtatur me qëndrueshmërinë dhe elegancën estetike, në përputhje me udhëzimet e Al-Maeshari. Dizajni i kuboidit modular është rezistent ndaj zjarrit, fleksibil dhe shumë efikas duke mundësuar përshtatshmëri funksionale.
Projekti përfshin dy variante të planifikimit hapësinor, variantin katror dhe atë rrethor, të dy variantet sigurojnë hapësirën prej 3.5m2 për pelegrin. Hapësirat janë të ndara në zona akomodimi, shërbime esenciale (tualete, hapësira abdesi), dhoma lutjeje, hapësira për kujdesin mjekësor, qendra informacioni dhe rrugë të mirëplanifikuara.
Projekti i Akomodimit Arafat ofron një përvojë të rehatshme dhe të qëndrueshme, duke ruajtur trashëgiminë kulturore ndërkohë që përqafon inovacionet moderne.
