Janë arrestuar dy persona pas vdekjes së dy punëtorëve në Gjakovë.
Prokuroria Themelore në Gjakovë, njofton opinionin publik se më datë 21.07.2025, është informuar nga Policia e Kosovës për një incident tragjik të ndodhur në një vendpunim, ku si pasojë kanë humbur jetën dy (2) punëtorë.
Menjëherë pas marrjes së informacionit, në vendin e ngjarjes kanë dalë Kryeprokurori, Prokurori kujdestar, njësitet përkatëse të Policisë së Kosovës, si dhe Inspektorati i Punës.
Me vendim të Prokurorit të Shtetit, trupat e pajetë janë dërguar për obduksion në Institutin e Mjekësisë Ligjore (IML).
Po ashtu, me vendim të Prokurorit të Shtetit, janë ndaluar dy (2) persona, në kohëzgjatje prej 48 orësh lidhur me këtë rast, për shkak të veprës penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.
Brenda afatit të paraparë ligjor, ndaj të njëjtëve do të paraqitet kërkesa për caktimin e masës së paraburgimit.
Prokurori i Shtetit, në koordinim të ngushtë me Policinë e Kosovës, po ndërmerr të gjitha veprimet e nevojshme për zbardhjen e këtij rasti.
Këtë e ka konfirmuar për media edhe Enis Gashi, kryeprokuror i Prokurorisë Themelore në Gjakovë, i cili bëri të ditur se bëhet fjalë për investitorin dhe punëkryesin.
Gashi gjithashtu njoftoi se dy të dyshuarit janë ndaluar për 48 orë.
“Kemi dy persona të dyshuar të cilët me vendim të prokurorit janë ndaluar për 48 orë. Në bazë të informacioneve deri tani, kemi të bëjmë me investitorin dhe punëkryesin”, thuhet në konfirmim.
