Liridon Osmani nga Komuna e Vushtrrisë, nuk po gjen rehati pas blerjes së një prone në këtë komunë.
Më 6 gusht, derisa kishte shkuar në pronën që tashmë e kishte përkthyer në emrin e tij, për të bërë disa rrënime të objekteve të pabanueshme aty.
Por, Liridon Osmani ka deklaruar se një person i quajtur Egzon Musliu, kishte ardhur tek prona dhe i kishte dhënë telefonin e tij punëtorit që Osmani e kishte kontraktuar për rrënim.
Përmes telefonit, Osmani thotë se Fatmir Gërbeshi i kishte thënë që të ndalte punën.
Osmani kishte refuzuar që punëtori të ndalte punën, ndërsa pas pak kohe thotë se aty kishte ardhur edhe babai i Fatmir Gërbeshit, Avdullah Gërbeshi.
“Don me na nxjerr punë edhe mu edhe vetes” – Liridon Osmani pretendon se këto ishin fjalët me të cilat i ishte drejtuar Avdullah Gërbeshi në pronën e tij, të cilat Osmani i kishte konsideruar si kanosje.
Pasi policia kishte ndërhyrë, të dyja palët ishin shoqëruar në polici.
Avokati i Avdullah Gërbeshit, ka deklaruar se klienti i tij i ka mohuar të gjitha këto akuza në polici.
Për këtë rast, Prokuroria Themelore në Mitrovicë ka bërë të ditur për Gazetën Nacionale se janë dërguar në mbajtje dy persona, Fatmir Gërbeshi dhe Egzon Musliu, të dyshuar për veprën penale “Detyrim”.
Cila është historia e Liridon Osmanit me anëtarët e familjes Gërbeshi?
Liridon Osmani kishte vendosur të blejë një pronë në Vushtrri, për të cilën kishte bërë marrëveshje me pronarin që e kishte parcelën në emrin e tij.
Por, Osmani kishte deklaruar se menjëherë pas marrëveshjes me pronarin e parcelës, ishte kontaktuar nga anëtarë të familjes Gërbeshi, të cilët i kishin kërkuar të tërhiqej nga marrëveshja me pretendimin se parcela ishte e tyre. Kjo sipas Osmanit nuk qëndron dhe mund të dëshmohet me dokumente.
Pasi nuk kishte pranuar të tërhiqej, Osmani pas disa muajsh ishte sulmuar fizikisht gati për vdekje, më pas bashkëshortja e tij ishte përcjellur me motor derisa ishte në automjetin e saj në Vushtrri, shtëpia i ishte sulmuar me breshëri plumbash nga një person i panjohur, duke i rrezikuar kështu Osmanit edhe familjarët që ishin në shtëpi.
E për të gjitha këto ngjarje, Osmani po drejton gishtin nga anëtarët e familjes Gërbeshi në Komunën e Vushtrrisë. Këto dyshime, Osmani thotë se i ka deklaruar edhe në polici, të cilën e kishte njoftuar edhe për kërcënimet që kishte pranuar në fillim, para se të blinte parcelën.
Osmani kishte deklaruar për Gazetën Nacionale se pasi ishte sulmuar fizikisht, kishte dyshime ndaj atyre që e kishin kërcënuar, pasi që sipas tij nuk kishte ndonjë problem me dikë tjetër. Prokuroria Themelore në Mitrovicë është ende duke e hetuar këtë rast.
Pas disa javës nga sulmi që i kishte ndodhur, bashkëshortja e Liridon Osmanit ishte përcjellur në qytet nga një motor ku ishin dy persona. Për këtë rast, policia kishte arrestuar një person të dyshuar, Arianit Gërbeshin. I njëjti ishte dërguar në paraburgim për 30 ditë, por ishte liruar nga paraburgimi pas ankesës në Gjykatën e Apelit.
Ani pse kishte menduar se problemet dhe presionet ndaj tij do të ndalonin, pasi që tashmë policia ishte në dijeni për rastet që po i ndodhnin, disa ditë më vonë shtëpia e Liridon Osmanit ishte sulmuar me breshëri plumbash nga një person i panjohur. Policia kishte arritur të gjente vetëm motorin që kishte përdorur i dyshuari, por nuk kishte arrestuar asnjë person të dyshuar.
Megjithatë, Liridon Osmani dëshmon se tashmë e kishte blerë parcelën në fjalë dhe e kishte përkthyer në emrin e tij nga pronari real i tokës, i cili sipas Osmanit është i gatshëm të dëshmojë edhe në Gjykatë që nuk kishte ndonjë marrëveshje paraprake me askënd për shitjen e asaj parcele, përpos me Liridon Osmanin.
Disa nga anëtarët e familjes Gërbeshi nuk është hera e parë që përballen me drejtësinë. Ata kanë qenë të arrestuar edhe më herët për vepra të ndryshme penale, përfshirë edhe fajden.
Ndërkaq, për rastin e fundit ndaj Liridon Osmanit, në mbajtje gjenden Fatmir Gërbeshi dhe Egzon Musliu.
