Asamblisti i Lëvizjes Vetëvendosje në Kuvendin Komunal të Ferizajt ka bërë kallëzim penal ndaj drejtoreshës së QKMF-së, Nadire Ymeri, dhe përfaqësuesit ligjor të QKMF-së, Ali Halimi, lidhur me dyshimet për keqpërdorimi i pozitës apo autoritetit zyrtar dhe cenimi i të drejtave të punësimit dhe papunësisë.
Arsyeja e paraqitjes së kallëzimit penal, sipas Rexhepit, ka të bëjë me punësime të kryeta pa konkurs publik në QKMF-në e Ferizajt, raporton Veriu.info.
Postimi i Amir Rexhepi:
DEKLARATË PUBLIKE
Të nderuar qytetarë të Ferizajt,
Sot, kam paraqitur kallëzim penal pranë Prokurorisë Themelore në Ferizaj ndaj drejtoreshës së QKMF-së, znj. Nadire Ymeri, dhe përfaqësuesit ligjor të QKMF-së, z. Ali Halimi, lidhur me dyshimet për veprat penale: Keqpërdorimi i pozitës apo autoritetit zyrtar dhe Cenimi i të drejtave të punësimit dhe papunësisë.
Si asamblist nga radhët e Lëvizjes VETËVENDOSJE! dhe si përfaqësues i qytetarëve të Ferizajt në Kuvendin Komunal, e konsideroj obligim publik të reagoj kur ka dyshime se një institucion publik është përdorur në kundërshtim me ligjin dhe në dëm të interesit publik.
Nga dokumentet zyrtare rezulton se në QKMF Ferizaj janë lidhur kontrata pune nga lista e pritjes, pa konkurs publik, ndonëse pranimi në shërbimin publik duhet të bëhet përmes procedurës së konkursit publik.
Pas ankesave dhe kundërshtimeve që janë bërë, vetë QKMF Ferizaj e ka anuluar vendimin për këto kontrata, duke konstatuar mungesën e bazës ligjore. Megjithatë, më vonë, në një rast që kemi zbuluar, është lidhur pajtim gjyqësor për kthim në punë, edhe pse fillimisht QKMF e kishte kundërshtuar padinë e personit, duke deklaruar se nuk ka bazë ligjore. Pastaj, pa asnjë arsye të qartë, ka lidhur pajtim gjyqësor për kthim në vendin e punës dhe pagesë të pagave.
Kjo krijon dyshim të arsyeshëm se pajtimi gjyqësor është përdorur si rrugë për të anashkaluar konkursin publik dhe për të rikthyer në fuqi një punësim që vetë institucioni paraprakisht e kishte anuluar si të pabazuar në ligj.
Institucionet publike nuk guxojnë të përdoren për marrëveshje të dyshimta, punësime pa konkurs dhe veprime që cenojnë besimin e qytetarëve.
Për këtë arsye, sot kam paraqitur kallëzim penal dhe kërkoj nga Prokuroria e Shtetit që rasti të hetohet plotësisht, pa ndikime politike dhe pa kursyer askënd. Qytetarët kanë të drejtë të dinë kush ka vendosur, mbi çfarë baze ligjore dhe në interes të kujt është vepruar.
Si opozitë, do të vazhdojmë të kërkojmë përgjegjësi, transparencë dhe respektim të ligjit në çdo institucion publik të Ferizajt.
Punësimi publik duhet të bëhet me konkurs, me meritë dhe me barazi, jo përmes keqpërdorimit të autorizimeve publike!
Amir Rexhepi
Asamblist nga radhët e Lëvizjes VETËVENDOSJE!
Përfaqësues i qytetarëve të Ferizajt në Kuvendin Komunal.
