Pas paralajmërimit të Zyrës së Rregullatorit për Energjinë Elektrike për një rritje të tarifave të energjisë prej 15 për qind, grupi qytetar “Asnjë cent më shumë” ka shpallur një protestë qytetare, e cila do të mbahet më 5 prill në Prishtinë.
Protesta do të mbahet nga ora 15:00 deri në 16:00, dhe grupi bën thirrje që të gjitha bizneset të mbyllin lokalet gjatë kësaj periudhe për të shprehur solidaritetin me qytetarët.
Në njoftimin e bërë publik, grupi thekson se kjo rritje e çmimit do të ndikojë drejtpërdrejt në bizneset, duke rritur koston e operimit dhe duke i detyruar ato të rrisin çmimet, çka mund të rrezikojë qëndrueshmërinë e aktiviteteve ekonomike.
Grupi “Asnjë cent më shumë” ka kërkuar që Qeveria dhe Zyra e Rregullatorit të rishikojnë këtë vendim dhe të marrin parasysh ndikimin negativ që do të ketë në jetën e qytetarëve dhe zhvillimin ekonomik të Kosovës.
