Më 5 nëntor, kryeministri në detyrë Albin Kurti bëri publike letrën që në vitin 2022 ia kishte dërguar kryetares së Dhomave të Specializuar, Ekaterina Trendafilova, por jo edhe përgjigjen e saj.
Ndonëse në momentin e publikimit të letrës së tij e kishte edhe përgjigjen e shefes së Gjykatës Speciale, ai zgjodhi të mbante të fshehur një gjë të tillë.
Vetëm mbrëmë, Kurti tregoi se shefja e Gjykatës Speciales i ka kthyer përgjigje.
Gjatë një interviste në Kanal 10, në vija të trasha ai tregoi përmbajtjen e përgjigjes së Trendafilove.
“Kam kërkuar dy gjëra nga kryetarja e Dhomave të Specializuara. E para: kam ofruar garancitë e mia që ata të vijnë në Kosovë dhe të qëndrojnë në Kosovë në burg. Të jenë pranë familjeve, që do të ishte një lehtësim i madh. Në rregull, ata po konsiderojnë që duhet të qëndrojnë në paraburgim, pse të qëndrojnë në Holandë, kur mund të jenë në Kosovë. Ai burg është”, ka thënë Kurti.
Ani pse nuk u pyet fare se pse nuk është publikuar deri me tani kjo përgjigje, Kurti bëri me dije se ai nuk mund ta bëj një gjë të tillë.
Sipas tij, këtë letër duhet të publikon Gjykata Speciale.
“E dyta që e kam kërkuar, është pyetja ime se a është e mundshme që Dhomat e Specializuara t’i trajtojnë edhe rastet e krimeve të kryera nga Serbia gjatë luftës në Kosovë. Për çështjen e parë, kryetarja e gjykatës pati thënë, pak a shumë, se nuk bën kthimi i tyre në Kosovë, ndërkaq për çështjen e dytë, ka qenë më shumë po se jo. Unë besoj se ata duhet ta publikojnë përgjigjen e tyre. Nuk është e mundshme kjo nga ana ime. Por, unë mund të tregoj se ata kanë qenë më shumë po se jo, ndërkaq për të paren kanë qenë më shumë jo se po”, ka deklaruar Kurti.
Kaq i sjelljen kryeministri Kurti nuk ishte treguar me shkëmbimin e letrave që ish-kryeministrit Hashim Thaçi në vitin 2013 kishte bërë me ish-sekretarin e NATO-s, Anders Fogh Rasmussenme, e cila njihet si marrëveshja e Thaçit me NATO-në për mosdërgimin e FSK-së në veri pa lejen e KFOR-it.
Ndonëse palët ishin zotuar që kjo marrëveshje të mos publikohej, me t`u bërë kryeministra, Albin Kurti e kishte bërë publike këtë marrëveshje, duke drejtuar akuza të ashpra ndaj Hashim Thaçit, i cili në momentin e publikimit të kësaj letre ishte president i Kosovës.
Më 5 nëntor të këtij viti, kryeministri në detyrë Albin Kurti, ka publikuar një letër të vitit 2022 që i kishte drejtuar kryetares së Gjykatës Speciale, Ekaterina Trendafilova, në lidhje me procesin gjyqësor që po zhvillohet në Hagë ndaj ish-krerëve të UÇK-së.
Në profilin e tij në Facebook, ai e kishte publikuar letrën në gjuhen angleze, duke pretenduar se ka punuar më heshtje për këtë çështje.
“Kështu kam menduar që nga dita e parë. Kemi punuar gjatë dhe me përkushtim për këtë çështje, në heshtje, sepse shpesh puna e mirë bëhet pa zhurmë. Por ndonjëherë puna që nuk shihet, nuk dihet”, kishte shkruar Kurti.
Ndër të tjera, ai ka thënë se vazhdimisht ka kërkuar lirimin e ish-krerëve të UÇK-së.
“E si Kryeministër, zyra ime dhe unë kemi kërkuar lirimin e tyre që nga fillimi. Në vijim po bashkëngjes letrën që i është dërguar drejtpërdrejt znj. Trandafilova në lidhje me këtë çështje në shtator të vitit 2022. E bëj publike sot për një arsye të vetme: sepse besoj se është e drejtë që ata të kthehen në shtëpitë e tyre, të jenë pranë familjeve të tyre, dhe ta mbrojnë në liri luftën e drejtë çlirimtare të Kosovës. Përgjigja e znj. Trandafilova pas dy javësh që mori letrën nga unë nuk ndryshoi gjë. Kërkesat e paraqitura nuk morën zgjidhje”, kishte shkruar Kurti.
Megjithatë, në statusin e tij të gjatë që ia kishte bashkangjitur letrës, Kurti nuk kishte treguar se ka marrë ndonjë përgjigje nga kryetares së Dhomave të Specializuar, Ekaterina Trendafilova.
Publikimin e kësaj letre Kurti kishte zgjedhur të bënte publike në 5-vjetorin e arrestimit të ish-krerëve të UÇK-së.
