Avokati Ardian Bajraktari ka deklaruar se, duke qenë se masa pezulluese është e vlefshme deri më 31 mars, Gjykata Kushtetuese duhet të marrë vendim para kësaj date, raporton GazetaBlic.Nëse vendimi nuk merret deri atëherë, sipas Bajraktarit, duhet të shtyhet afati i masës, përndryshe duhet që të zbatohet dekreti i presidentes.
“Duke qenë se masa pezulluese është e vlefshme deri më 31 mars, Gjykata duhet të marrë vendim para kësaj date. Nëse nuk merret vendim meritor deri atëherë, Gjykata duhet të shtyjë afatin e masës, pasi mosmarrja e vendimit dhe mos-shtyrja e masës do të nënkuptonte mundësinë e zbatimit të dekretit të presidentes”, tha ai për GazetaBlic.Kujtojmë se, Gjykata Kushtetuese ka vendosur masë të përkohshme deri më 31 mars ndaj dekretit të presidentes Vjosa Osmani për shpërndarjen e Kuvendit të Kosovës.
Kushtetuesja tha se vendimi ia ndalon çdo veprim presidentes Osmani në lidhje me dekretin e 6 marsit, si dhe ia ndalon çdo veprim Kuvendit të Kosovës derisa masa e përkohshme është në fuqi.Gjykata vlerësoi se masa e përkohshme “është në funksion të parandalimit të shkaktimit të dëmit të pariparueshëm për rendin kushtetues të Kosovës dhe funksionimin demokratik të institucioneve kyç në Kosovë”.
