Kryetari i Mitrovicës, Faton Peci ka nisur ditëve të fundit një aksion për lirimin e hapësirave publike, me ç’rast ka bërë disa rrënime dhe ka liruar trotuarët në disa pjesë të qytetit. Por deri më tash, ky aksion nuk po rezulton të jetë gjithëpërfshirësh.
Lexues të Veriu.info ka dërguar fotografi në redaksi, duke denoncuar një rast të uzurpimit të një parkingu publik të automjeteve me material ndërtimor nga kompania e ndërtimit “Aurora Group”.
Veriu.info para tri ditësh ka dërguar pyetje në Komunën e Mitrovicës për të marrë përgjigje se a ka leje kompania “Aurora Group” per vendosjen e materialit ndertimore ne parkingun publik te automjeteve ne rrugen “Nexhip Dragaj” (perball KRM “Uniteti”) dhe nëse nuk ka çfarë veprime do të ndërmerren për lirimin e këtij parkingu.
Nga Zyra për Informim e Komunës së Mitrovicës nuk kemi marrë përgjigje deri në publikimin e këtij artikulli, edhe pse dje prapë ua kemi rikujtuar pyetjet e bëra më 28 janar.
Burime të Veriu.info bëjnë të ditur se ky subjekt afarist nuk ka leje nga komuna për shfrytëzimin e këtij parkingu publik të automjeteve si ‘depo’ të materialit ndërtimor për qëllime të biznesit të tij.
Ndryshe, lexuesit e Veriu.info që e kanë denoncuar rastin, kanë thënë që shfrytëzimi i këtij parkingu si ‘depo’ e materialit ndërtimore nga “Aurora Group” ka nisur në qeverisjen e Bedri Hamzës dhe po vazhdon edhe në qeverisjen e Faton Pecit.
