Procesi gjyqësor ndaj krerëve të UÇK-së në Hagë, që nisi në prillin e vitit 2023, përfundimin pritet ta ketë më së largu më 22 dhjetor.
Kjo është data që Trupi Gjykues e ka dhënë si afat për palët të dorëzojnë shkresat përfundimtare në gjykimin ndaj Hashim Thaçit, Kadri Veselit, Rexhep Selimit e Jakup Krasniqit.
Sa i përket kësaj çështje avokati Ardian Bajraktari, për GazetaBlic ka thënë se dëshmitarët që do të paraqiten janë të besueshëm dhe kredibile, kësisoji opinioni do të shohë të kundërtën e asaj që pa deri tash.
“Faza pasuese, në fillim mes shtatorit dhe tetorit, do të jetë vendimtare, me theks të veçantë sa i përket mbrojtjes, për shkak se, siç është edhe tashmë e konfirmuar, do të ketë numër të dëshmitarëve kredibil dhe të besueshëm. Që, në bindjen time, do të dëshmojnë të kundërtën e asaj që kemi parë deri tash në pretendimet e prokurorisë. Prandaj vlerësoj që, përmes dëshmive të dëshmitarëve, të cilët janë jashtëzakonisht të besueshëm, që janë kredibil dhe kanë peshë në periudhën që ngarkohen me aktakuzë ish-krerët e Ushtrisë Çlirimtare të Kosovës, opinioni do të shohë saktësisht të kundërtën e asaj që kemi pa deri tash”, tha Bajraktari .
Sipas Bajraktarit, datat janë indikative, por pritet që procesi mund të përfundojë brenda këtij viti, ndërsa vendimmarrja në shkallë të parë në fillimin e vitit 2026.
“Data sigurisht është indikative, nuk përjashtohet mundësia të ndryshojë, megjithatë janë bërë përpjekje të vazhdueshme, me theks të veçantë i palës mbrojtëse, për ta siguruar prezencën e dëshmitarëve. Jemi në një fazë drejt përfundimit të këtij procesi të stërzgjatur, sipas kësaj dinamike, procesi mund të përfundojë brenda këtij viti, ndërsa vendimmarrja së paku në shkallë të parë deri në pjesën e parë të vitit 2026”, tha ai.
Tutje, avokati shton se pikat kyqe të aktakuzës si ndërmarrja e përbashkët kriminale ka dështuar të argumentohet nga prokuroria.
“Mbi bazën e asaj që kemi parë deri tash, natyrisht që jemi bukur të hendikepuar për faktin që kemi parë jashtëzakonisht pak; është cenuar një prej parimeve bazë, që është parimi i publicitetit. Po ashtu, çka kemi parë tash pika kyçe ose elementeve të aktakuzës është ajo e ndërmarrjes së përbashkët kriminale, që në dy vendime prokuroria nuk ka arritur të argumentoj mjaftueshëm, e natyrisht kësaj do t’i kontribuojë në masë të madhe shpallja e pafajshme. Do t’i kontribuojë dëshmia e dëshmitarëve, që do të konfirmojnë angazhimin e ish-krerëve të Ushtrisë Çlirimtare të Kosovës, me theks të veçantë të zotit Thaçi, në drejtim saktësisht të kundërt me çka janë ngarkuar deri tani”, u shpreh Bajraktari.
Veç këtyre, ai thotë se qeveria e Kosovës është angazhuar minimalisht në këtë proces pasi që këta persona nuk po akuzohen personalisht por si ish-krerë të Ushtrisë Çlirimtare të Kosovës.
“Qeveria ka bërë minimalen e mundshme në raport me këtë proces, për faktin se, krahas me ligjin për dhomat e specializuara, është miratuar edhe ligji për mbrojtjen dhe mbështetjen financiare, dhe siç dihet, procesi në masë ja ka hasur në vështirësi të konsiderueshme. Sigurimi i mbrojtjes juridike është obligim ligjor; sigurimi i një mbështetjeje sa më kualitative është obligim përtej ligjores. Në fund të fundit, këta persona nuk akuzohen aty për gjëra personale, por si ish-krerë të Ushtrisë Çlirimtare të Kosovës, e përtej kësaj. Ky proces, kjo gjykatë, siç dihet, është politike. Angazhimi i diplomacisë kosovare, me theks të veçantë angazhimi të vënies para opinionit publik të shkeljeve, që janë bërë në mënyrë të vazhdueshme”, përfundon ai.
