Ish-kryetari i Komisionit Qendror të Zgjedhjeve (KQZ), Mazllum Baraliu, ka komentuar vonesat dhe paqartësitë gjatë procesit zgjedhor, duke theksuar se këto krijojnë pakënaqësi dhe pritshmëri te qytetarët, të cilët janë shumë të interesuar për rezultatet dhe formimin e institucioneve.
Në një intervistë për Ekonomia Online, Baraliu ka theksuar se vonesat dhe ndërhyrjet në proces shkaktojnë dyshime dhe mund të dëmtojnë besimin e qytetarëve në procesin zgjedhor.
“Pa dyshim që krijon ndjenjë të pakëndshme dhe sigurisht dhe pritshmëri më shumë dhe pakënaqësi te qytetarët për arsye se një pjesë e madhe e qytetarëve në përqindje kanë qenë votues ose idhtar të ndonjërit prej subjekteve politike. Prandaj interesimi për rezultate për performancën dhe ecurinë e formimit të institucioneve dhe për atë se çfarë përbërje të kuvendit dhe të qeverisë do të kemi qytetarët kanë interesim të jashtëzakonshëm dhe kjo tregon për një vetëdije të lartë demokratike dhe politike për një pjekuri prandaj vonesat në proces dhe paqartësitë në proces për shkak që të njohura për votuesit patjetër që ndikojnë tek qytetarët dhe lënë shije të keqe dhe të pa dëshiruar dhe do të duhet të ketë një reflektim për zgjedhjet e vjeshtës që të mos përsëritet në ato që na ndodhën në këtë proces për arsye të shumta dhe për shkak të detyrave që ka KQZ-ja”, ka thënë Baraliu.
Megjithatë, Baraliu ka theksuar se, përkundër problemeve teknike, procesi ka legjitimitet të plotë dhe nuk ka pasur keqpërdorime serioze.
“Kur ka vonesa kur ka ndërhyrje dhe ngecje në proces në atë pjesën më delikate dhe të rëndësishme ku do të duhej të diheshin rezultatet për kandidat dhe subjektet politike. Ne nuk kemi ende qartësi të plotë si qytetarë se çka ka ndodhur dhe pse ka ndodhur dhe cilat është rezultati i procesit të hetimit nuk kemi asgjë dhe heshtje totale, një errësire informative dhe një heshtje e pakuptueshme që krijon dyshime te qytetarët që dikush në një mënyrë e ka dëmtuar me qëllim për arsye anti kosovare e shtetërore të dëmtojë procesin qoftë për interesa të veta ose interesa të faktorit të jashtëm, i cili nuk është i orientuar miqësisht ndaj Kosovës, e të tillë ka mjaftë duke filluar nga Kremlini, Rusia deri tek Beogradit”, shtoi ai.
Ai ka kërkuar reflektim për të shmangur përsëritjen e problemeve në zgjedhjet e ardhshme.
“Ky proces përkundër të gjitha këtyre që na kanë ndodhur janë kryesisht probleme teknike, nuk ka pasur keqpërdorime ose abuzime dhe dëmtim serioz të integritetit të procesit dhe tërësisht sepse procesi është verifikuar edhe një herë. Ky proces ka legjitimitetin tërësinë dhe rregullsinë kushtetuese dhe ligjore të plotë derisa nuk kemi diçka që ne nuk e dimë. Natyrisht që në proces ka ankesa të subjekteve politike derisa ai proces nuk përmbyllet nuk mund të themi se çdo gjë do të jetë në rregull, por jam i bindur që procesi nuk do të dëmtohet”, theksoi ish-kryetari i KQZ-së për EO.
