Lëvizja Vetëvendosje ka dështuar edhe sot të sigurojë mbështetje për kandidatët e saj për kryeparlamentar, duke e lënë të bllokuar procesin e konstituimit të Kuvendit.
Pas dështimit me Albulena Haxhiun dhe Hekuran Muratin, sot ishin Dimal Basha dhe Arberie Nagavci ata që nuk arritën të sigurojnë votat e nevojshme në seancën konstituive.
Partitë opozitare kanë refuzuar këta emra, duke treguar se edhe pas fushatës për “ndryshim”, VV-ja nuk ka arritur të ofrojë liderë të kualifikuar dhe të përgatitur për pozita kyçe.
Ky dështim ka nxjerrë në pah edhe performancën e dobët akademike të dy kandidatëve të propozuar. Deputeti Dimal Basha, ka pasur rezultate të dobëta në shkollë. Një dëftesë tregon se në vitin e tretë ka marrë nota 1 në Biologji, ndërsa rezultatet e tjera ishin shumë larg vlerësimeve të larta.
Ministrja në detyrë e Arsimit, Arberie Nagavci, ka përfunduar studimet me një mesatare prej vetëm 6.46. Ky rezultat, i konsideruar i ulët për dikë që aspiron pozita të larta politike, ka shkaktuar reagime të shumta në publik. Studimet e saj kanë zgjatur një dekadë (2009-2019).
