Bashkimi Evropian do të nisë më 2 gusht zbatimin e rregullave të reja për transparencën e inteligjencës artificiale, duke detyruar kompanitë që të identifikojnë qartë çdo përmbajtje të krijuar ose të manipuluar me AI.
Këto masa janë pjesë e Aktit Evropian për Inteligjencën Artificiale (AI Act), i cili po hyn në fuqi në mënyrë graduale.
Sipas rregullave të reja, chatbot-et duhet të identifikohen qartë si sisteme të inteligjencës artificiale. Po ashtu, imazhet, videot, tekstet dhe materialet audio të krijuara ose të manipuluara me AI duhet të pajisen me etiketa ose shenja digjitale, si watermark-et, që mundësojnë identifikimin e tyre. Kompanitë që nuk respektojnë këto detyrime mund të përballen me gjoba të larta.
Komisioni Evropian vlerëson se zhvillimi i inteligjencës artificiale gjeneruese ka rritur ndjeshëm rrezikun e dezinformimit, pasi përmbajtje të rreme mund të krijohen dhe të shpërndahen me shpejtësi në shkallë të gjerë.
Shqetësim i veçantë mbeten edhe “deepfake”-et, materiale që duken autentike, por janë krijuar ose manipuluar nga inteligjenca artificiale.
Rregullat e reja zbatohen për përmbajtjet e krijuara për qëllime profesionale, ndërsa përdorimi personal i inteligjencës artificiale nuk preket.
Edhe përmbajtjet informuese për çështje me interes publik do të duhet të etiketohen, nëse janë gjeneruar nga AI pa mbikëqyrje editoriale njerëzore.
Sistemet ekzistuese do të kenë afat deri më 2 dhjetor për t’u përshtatur me kërkesat e reja. Nga këto detyrime përjashtohen veprat artistike, krijimet satirike dhe përmbajtjet e zhanrit fiksion.
Ndërkohë, disa nga platformat më të mëdha teknologjike kanë nisur tashmë zbatimin e praktikave të tilla.
TikTok kërkon prej vitesh etiketimin e përmbajtjeve të krijuara me AI, Meta përdor etiketën “AI Info” në Facebook dhe Instagram, ndërsa Google ka nënshkruar Kodin Evropian të Transparencës dhe po bashkëpunon me kompani si OpenAI, Nvidia dhe Apple për zhvillimin e standardeve të përbashkëta për identifikimin e përmbajtjeve të gjeneruara nga inteligjenca artificiale.
