Komisioni Evropian dëshiron t’u ndalojë fëmijëve nën moshën 13 vjeç përdorimin e platformave të mediave sociale dhe të kufizojë funksione që krijojnë varësi.
Ursula von der Leyen, presidente e Komisionit Evropian, prezantoi një plan që synon t’i mbrojë fëmijët nga rreziqet që lidhen me disa platforma të mediave sociale. Nisma synon të ndalojë aksesin në platforma si Facebook, TikTok dhe Instagram për fëmijët nën moshën 13 vjeç.
“Ajo për të cilën tashmë kemi konsensus është se duhet të ketë një moshë minimale kur fëmijët mund t’u bashkohen mediave sociale”, tha von der Leyen, duke kërkuar “kufizime të përshtatshme për moshën”.
Masa vjen pas propozimeve të ngjashme të paraqitura në Australi, Mbretërinë e Bashkuar, Kinë, Indi, Turqi dhe në disa vende evropiane, si përgjigje ndaj shqetësimeve në rritje për ndikimin që mediat sociale mund të kenë në shëndetin mendor të fëmijëve.
“Sot, fëmijët tanë po ndërveprojnë me disa nga teknologjitë më të sofistikuara që janë krijuar ndonjëherë, dhe ato nuk janë projektuar duke pasur në qendër mirëqenien dhe zhvillimin e tyre”, tha von der Leyen gjatë një konference për shtyp.
Reforma e propozuar për Ligjin Evropian për Mbrojtjen e Fëmijëve “do të vendosë kufij të qartë në botën digjitale, ashtu siç bëjmë çdo ditë në botën reale”, shtoi ajo.
A bien ligjet evropiane në kundërshtim me njëri-tjetrin?
Organizata jofitimprurëse CCIA Europe, e cila përfaqëson kompani të mëdha teknologjike në Evropë, ndër të cilat edhe Google dhe Meta, paralajmëroi për rreziqe të mundshme ndaj privatësisë që mund të lindin nga ky propozim dhe vuri në dukje se ai mund të bierë në kundërshtim me kërkesat e ligjeve të tjera të Bashkimit Evropian.
Propozimi i Ursula von der Leyen do t’u japë prindërve më shumë kontroll mbi llogaritë e të rinjve të moshës 13 deri në 15 vjeç.Fotografi: Matteo Della Torre/NurPhoto/picture alliance
“Mbledhja në një shkallë të tillë e të dhënave për moshën, dokumenteve të identitetit dhe informacioneve lidhur me fëmijët dhe prindërit ose kujdestarët e tyre do të krijonte pa dyshim një objektiv tërheqës për kriminelët kibernetikë”, tha drejtori i CCIA Europe, Daniel Friedlaender.
“Ligji për Fëmijët krijon mbivendosje ligjore dhe dublikim të rregulloreve, gjë që në fund dobëson mbrojtjen e fëmijëve dhe të konsumatorëve”, shtoi ai.
Më shumë kontroll nga prindërit dhe rregulla më të rrepta
Propozimi i Ursula von der Leyen do t’u japë prindërve më shumë kontroll mbi llogaritë e të rinjve të moshës 13 deri në 15 vjeç. Nisma do të diskutohet gjatë muajve të ardhshëm nga shtetet anëtare të Bashkimit Evropian dhe Parlamenti Evropian, përpara se të mund të shndërrohet në ligj.
Llogaritë në rrjetet sociale, shërbimet e videove, videolojërat online dhe chatbot-et të destinuara për përdorues nën moshën 18 vjeç do t’u nënshtrohen një sërë rregullash më të rrepta.
Nisma vjen pas propozimeve të ngjashme të paraqitura në Australi, Mbretërinë e Bashkuar, Kinë, Indi, Turqi dhe në disa vende evropiane, si përgjigje ndaj shqetësimeve në rritje për ndikimin që mediat sociale mund të kenë në shëndetin mendor të fëmijëve.
Këto përfshijnëndalimin e funksioneve që konsiderohen krijuese të varësisë, si lëvizja e pafundme e përmbajtjes (infinite scrolling) dhe fillimi automatik i videove (autoplay). Propozimi gjithashtu synon të kufizojë rekomandimet e drejtuara nga algoritmet, profilizimin e personalizuar, mekanizmat e angazhimit të bazuar në shpërblime dhe kontaktet e padëshiruara nga persona të panjohur.
Një tjetër kërkesë e Parlamentit Evropian është që platformat të detyrohen të zbatojnë dizajne dhe algoritme të sigurta për fëmijët, si edhe të ofrojnë mjete të thjeshta për kontrollin prindëror.
Përveç kësaj, kompanitë e mëdha të teknologjisë do të duhet të forcojnë sistemet e verifikimit të moshës për këdo që dëshiron të hapë një llogari. Kompanitë që nuk respektojnë këto rregulla mund të përballen me gjoba deri në 6% të të ardhurave të tyre vjetore globale. Ato gjithashtu do të detyrohen të investojnë më shumë burime në mbikëqyrjen dhe moderimin e përmbajtjeve. / DW
