Kryeministri i Kosovës, Albin Kurti, dje në një konferencë për media ka kritikuar ashpër përfaqësuesin e Bashkimit Evropian në dialogun mes Kosovës dhe Serbisë, Miroslav Lajçak.
Pas kësaj, sot Bashkimi Evropian ka reaguar përmes një komunikate të gjatë, ku ka kritikuar të dyja palët, Kosovën dhe Serbinë, për mungesën e zbatimit të Marrëveshjes drejt Normalizimit dhe Aneksit të implementimit për të cilën gjë palët u morë vesh në fillim të këtij viti, raporton Gazeta Online Veriu.info.
“Pas takimit të nivelit të lartë të dialogut Beograd-Prishtinë më 14 shtator në Bruksel, BE-ja shpreh shqetësimin e saj për mungesën e zbatimit nga palët të angazhimeve të tyre sipas Marrëveshjes për Rrugën drejt Normalizimit dhe Aneksit të zbatimit të saj, për të cilat të dyja palët ranë dakord në fillim të këtij viti, dhe të cilat janë të detyrueshme për to dhe luajnë rol në rrugën evropiane të palëve.” – thuhet në komunikatën e Bashkimit Evropian.
BE përmes kësaj komunkate kritikon specifikisht Kosovën lidhur me praninë e forcave speciale të Policisë së Kosovës siç thonë ata për detyrat e policisë në komunitet duke theksuar se kjo nuk është në përputhje me sundimin e ligjit dhe se rrezikon në tensionimin e mëtejmë të situatës.
“Në këtë kontekst, lëvizjet e Kosovës – duke përfshirë shpronësimet e tokës në veri të Kosovës, urdhrat e dëbimit në telekomunikacion dhe përdorimin e forcave speciale të policisë për detyrat e policisë në komunitet – nuk janë në përputhje me sundimin e ligjit dhe rrezikojnë të kontribuojnë për rritjen e mëtejshme të tensioneve.” – thuhet në komunikatën e BE-së.
BE-ja me mesazh për Kurtin: Asociacioni të themelohet pa vonesa dhe pa parakushte