Bashkimi Evropian ka reaguar lidhur me ndërtimin e dy urave të reja mbi lumin Ibër, duke paralajmëruar autoritetet kosovare që të përmbahen nga çdo veprim i njëanshëm dhe i pakoordinuar në Mitrovicë.
BE ka konfirmuar se aktualisht është duke kryer një vlerësim rutinë strukturor të urës dhe një studim urbanistik të zonës përreth.
Sipas tyre, ky proces nuk sinjalizon ndonjë ndryshim në status quo, por synon që çdo vendim i ardhshëm të mbështetet në të dhëna të freskuara, teknike dhe objektive.
“Ky vlerësim nuk sinjalizon ndonjë ndryshim në status quo, por synon të sigurojë që çdo vendim në lidhje me të ardhmen e urës të bazohet në të dhëna teknike të rifreskuara, të sakta dhe objektive”, thanë nga BE.
BE thekson se autoritetet e Kosovës janë informuar paraprakisht për këtë vlerësim teknik, ndonëse zëvendësministri në detyrë, Hysen Durmishi së fundmi deklaroi se nuk kanë marrë njoftim zyrtar për këto testime.
Nga Brukseli konfirmojnë po ashtu se po koordinohet ngushtë me partnerët e saj ndërkombëtarë në Kosovë në lidhje me të ardhmen e urës.
Ndër të tjera, i bëhet thirrje autoriteteve kosovare që të përmbahen nga çdo veprim i pakoordinuar, përfshirë ndërtimin e urave në afërsi, ndërsa kërkohet që të gjitha marrëveshjet e dialogut, përfshirë atë që ka të bëjë me urën.
“BE-ja po koordinohet ngushtë me partnerët e saj ndërkombëtarë në Kosovë në lidhje me të ardhmen e urës. Ndërkohë, ne i nxisim autoritetet e Kosovës të përmbahen nga çdo veprim i pakoordinuar, përfshirë ndërtimin e urave ngjitur.Të gjitha marrëveshjet e Dialogut Beograd-Prishtinë, përfshirë atë që ka të bëjë me urën, duhet të zbatohen plotësisht”.
