Biznesmeni ferizajas, Kushtrim Llabjani që ka më shumë se një kompani të regjistruar, e që në publik shfaqet i afërt me figurën e rëndësishme të PDK-së, Elmi Reçica, me njërën nga to ka përfunduar në Listën e Zezë të OShP-së.
Muaj më parë Gazeta Insajderi raportoi se si biznesmeni nga Ferizaj, Kushtrim Llabjani, i cili nuk e fshihte afërsinë me deputetin, dhe njërën nga figurat e rëndësishme te PDK-së, Elmi Reçica kishte arritur të shpërblehej me një tender për të i shitur kamionë të përdorur “Pastrimit”, kompanisë që drejtohet nga Petrit Reçica.
Detajet e këtij raportimi i gjeni këtu:
Por, Llabjani nuk është pronarë vetëm në firmën që mori tender nga “Pastrimi”, një kompani që së fundmi i bë shpesh lajm për përplasjet që menaxhmenti i saj pati me pushtetin e LDK-së në Prishtinë.
Llabjani është ortak në “Going Green Solutions SH.P.K.” e themeluar një vit më parë, e ku mban shumicën e aksioneve, derisa ortak me 49 % të tyre e ka Lum Gashin.
Kjo kompani hyri në garë, dhe madje fitoi, për të marrë një tender për shitjen e automjeteve jashtë përdorimit dhe pajisjeve të tjera të kompanisë regjionale “KRM Pastërtia Sh.a” në Ferizaj.
Krejt historia nisi kur kompania e dyshes, LLabjani e Gashi, aplikuan për këtë punë në “Pastërtia” Sh.A. dhe madje edhe e fituan, por në fund u tërhoqën nga tenderi.
Kjo ndërmarrje pastaj i denoncoi të Organi Shqyrtues i Prokurimit, pasi që sipas tyre një tërheqje e tillë bie ndesh me nenin 25.9 të rregullores për prokurim, për çka pajtohet edhe vet OSHP-ja që e ka vendosur tashmë këtë kompani në Listën e Zezë duke ia ndaluar pjesëmarrjen në tenderë deri më 18 shtator të këtij viti.
Gazeta Insajderi e ka kontaktuar firmën në fjalë, në kontaktet që ka publike, por deri tash nuk ka marrë ndonjë përgjigje nga ta.
E njëjta kompani megjithatë i pati dhënë një version të saj OShP-së, që nuk e bindi mjaftueshëm këtë mekanizëm, prandaj dhe aplikoi dënimin tre muaj mos—pjesëmarrje në prokurime publike.
“…pasi jemi shpall fitues në këtë tender e kemi vizituar vendin dhe aty kemi vërejtur se ka shumë llastër, e cila cmimin në tregun e Kosoves e ka 0.12 centë, ndërsa dhe ka pasur shumë matriale palstik nëpër kamion edhe duke e parë rrezikun që nuk mund ta realizoj kontratën e kam dërguar e-mail në zyrën e prokurimit dhe jam tërhequr sepse çmimin të cilin e kemi ofruar ka qenë 0.38 cent, ndërsa operatori mbrapa ka qenë 0.35 cent, kështu që nuk e kam pa të arsyeshme të vazhdoj në këtë aktivitet as nuk kam falsifikuar dukumente apo diçka të tillë dhe jam tërhequr”, thuhet në përgjigjhen e “Going Green Solutions SH.P.K.” dhënë OSHP-së.
Kushtrim Llabjani është një biznesmen nga Ferizaj.
Ai është ortak në firmën “LEDI SH.P.K.” dhe një pjesë të aksioneve në këtë kompani i ka edhe Zekrija Kamberi. Kjo firmë është liderë e konzorciumin me të cilën mori 350 mijë euro nga “Pastrimi”, për 10 kamionët e përdorur.
Llabjani ka në pronësi edhe 51 përqind të aksioneve në firmën “Going Green Solutions SH.P.K” në ortakëri me Lum Gashin dhe është aksionar i vetëm në “N.T.P. ” NOA”.
Ai po ashtu është i punësuar në një institucion publik shëndetësor në Ferizaj, derisa si sekondare merr edhe një pagë nga firma e ndërtimeve “DAAKONN SH.P.K” nga Ferizaj.
Por, ky biznesmen që ka firmë të vetën dhe aksione në dy firma të tjera, shoqërohet edhe me deputetin e PDK-së nga Feriaj, Elmi Reçica.
Në njërën prej fotografive që ka siguruar Insajderi, biznesmeni Kushtrim Llabjani është bashkë me deputetin Reçica në një ambient partiak- me llogot e PDK-së mbrapa.
Gazeta Insajderi e pati pyetur Drejtorin e “Pastrimit”, Petrit Reçica për afërsinë eventuale me deputetin Reçica, por i njëjti nuk ishte përgjigjur dhe njëjtë pati vepruar edhe deputeti Elmi Reçica,
As vet biznesmeni LLabjani nuk pati dërguar përgjigje edhe pse Insajderi e ka pritur për më shumë se një javë për të komentuar fotografitë me njeriun e PDK-së, Elmi Reçica./Gazeta Insajderi
