Deputeti i Partisë Demokratike të Kosovës (PDK), Artan Behrami, ka reaguar pas deklaratës së ministrit për Komunitete dhe Kthim, Nenad Rashiq, lidhur me vendimin për transferimin e 24 hektarëve tokë në emër të Manastirit të Deçanit.
Përmes një reagimi publik, Behrami tha se disa nga vendimet e kryeministrit Albin Kurti janë marrë “për hatër” të Rashiqit, duke përmendur edhe marrëveshjen e arritur në Ohër në vitin 2023.
“Për hatër të Rashiqit, Albin Kurti u dhuroi serbëve të veriut autonomi territoriale në 2023 në Ohër. Për hatër të Rashiqit, Kurti ia ka falë 24 hektarë Manastirit të Deçanit në 2024”, ka shkruar Behrami.
Ai e krahasoi këtë me qëndrimin e kryeministrit ndaj kryetarit të Sindikatës së Bashkuar të Arsimit, Shkencës dhe Kulturës, Rrahman Jashari, duke thënë se kërkesat e tij nuk u morën parasysh nga Qeveria.
“A kur Rrahman Jashari i SBASHK-ut ia kërkonte: ‘ndihmom si vëlla’, Albini e refuzonte”, deklaroi Behrami.
