Konsiderohet si ndërtuesi i ‘fortë’ i Skenderajt, pasi që në prapaskenë shihet në shoqërinë e kryetarit Sami Lushtaku, me të cilin në fund të vitit të kaluar kishte realizuar edhe një vizitë në Libi, për të cilën Veriu.info kishte raportuar ekskluzivisht. Fjala është për biznesmenin Astrit Çitaku. Por afërsia me kryetarin e Skenderajt, Sami Lushtaku nuk po e mbron në punët ‘shkel e shko’ që po i bën në një objekt banesor në Skenderaj, për të cilin është gjobitur nga Inspektorati i Punës.
Veriu.info ka siguruar një vendim të Inspektoratit të Punës të nxjerrë më 23 dhjetor 2025, me të cilin i shqiptohen tri (3) gjoba subjektit afarist “Andrra Invest” L.L.C., me pronar Astrit Çitaku, në shumë totale prej 5 mijë euro.
Sipas vendimit të Inspektoratit të Punës, në objektin banesor që po e ndërton kompania e Astrit Çitakut, në momentin e inspektimit është evidentuar mungesë e masave të sigurisë dhe shëndetit në punë, pasi që objekti nuk ishte i pajisur me skele, nuk ishin të mbyllura hapësirat në kontakt me jashtë, nga ku rrezikohej të binin punëtorët dhe nuk ishin vendosur parmakët në hapësirat te shkallët e ashensorët. Për shkak të këtyre shkeljeve, nga inspektorët e punës ishin ndaluar punimet në objektin “Andrra Premium”.
Disa ditë pas ndërprerjes së punimeve, kompania “Andrra Invest” L.L.C. kishte bërë kërkesë në Inspektoratin e Punës për lejimin e vazhdimit të punimeve, por pas riinspektimit ka dalë se kjo kompani e Astrit Çitakut nuk kishte ndërmarrë masat siç ka qenë e obliguar, pasi që të njëjtat i kishte përmbushur vetëm pjesërisht, duke tentuar kështu të fusë në lajthitje inspektorët e punës.
Me rastin e riinspektimit të dytë më 8 dhjetor 2025, inspektorët kishin konstatuar se “Andrra Invest” kishte marrë masat e nevojshme nga aspekti i sigurisë dhe shëndetit në punë, por me këtë rast është evidentuar edhe një shkelje tjetër, pasi që kompania e Astrit Çitakut kishte vazhduar paraprakisht punimet në kundërshtim me ligjin, pasi që kishte vendim aktiv të ndalimit të punimeve.
Historiku me shumë probleme i Astrit Çitakut me “Andrra Invest”
Veriu.info në shtator të vitit 2024 kishte raportuar se Astrit Çitaku kishte kanosur një inspektore të Inspektoratit të Punës, pas ndalimit të punimeve në objektin banesor që po e ndërtonte në Skenderaj.
Inicimin e rastit për veprën penale kanosje e kishte konfirmuar asokohe edhe Policia e Kosovës, ku zëdhënësi Avni Zahiti kishte thënë për Veriu.info: “Ankuesja F/Sh/K, zyrtare në Inspektoratin e Punës, ka raportuar se derisa ishte në detyrë, përmes telefonit është kanosur nga një i dyshuar M/Sh/K”.
Pronari i “Andrra Invest” kanos inspektoren e Punës, policia inicion rast për këtë vepër penale
Mediat kishin raportuar se ndaj zyrtarëve të Komunës së Skenderajt ishte ngritur aktakuzë për “Keqpërdorim të pozitës apo autoritetit zyrtar”, për shkak të një objekti të kompanisë “Andrra Invest”, i cili ishte përcjellë me ankesa nga banorët fqinj për dëmtim të pronave të tyre. Prokuroria kishte konfirmuar se edhe ndaj Astrit Çitakut ishin duke u zhvilluar hetime në këtë rast.(https://paparaci.com/439249/demtoi-banoret-me-lagjen-luksoze-ngritet-aktakuze-ndaj-pronarit-te-andrra-residence/)
Veriu.info kishte raportuar më 2023 se si në kompleksin banesor të “Andrra Invest” kishte rrëshqitur dheu dhe janë dëmtuar pilotat, gjë të cilën e kishte pranuar edhe vetë Astrit Çitaku.
Vizita me Sami Lushtakun në Libi?
Veriu.info në janar 2026 ka raportuar për një vizitë ‘misterioze’ të Astrit Çitakut me Sami Lushtakun në Libi, për të cilën pronari i “Andrra Invest” nuk kishte pranuar të tregojë arsyen e vizitës.
Në një përgjigje për Veriu.info në lidhje me këtë vizitë, Çitaku kishte thënë: “Çfarë lajmi? Pse duhet me ditë? Unë në Prishtinë ndërtoj, në Skenderaj e kam kry!”
Por po del që në Skenderaj nuk e ka kryer, pasi që vetëm një muaj para kësaj përgjigjeje atij i ishin ndaluar punimet në objektin “Andrra Premium”.
Ndryshe, Astrit Çitaku është djali i axhës së Arben Çitakut, ish sekretarit të Ministrisë së Mjedisit dhe Planifikimit Hapësinor, i cili sa ishte në pozitë ka qenë njëri prej personave më të afërt të Sami Lushtakut.
LEXONI EDHE:
