Belgjika pritet të njohë Palestinën si shtet në Asamblenë e Përgjithshme të Kombeve të Bashkuara në Neë York që pritet të mbahet në muajin shtator.
Lajmi ështëë njoftuar nga ministri i Jashtëm Maxime Prevot, i cili përmes një postimi në platformën X, bëri me dije se Belgjika do t’u bashkohet vendeve të tjera që kanë njohur tashmë shtetësinë palestineze, ndërkohë që do të miratojë një paketë sanksionesh kundër Izraelit.
“Qeverisë izraelite po i vendosen sanksione të forta. Çdo antisemitizëm ose glorifikim i terrorizmit nga mbështetësit e Hamasit do të dënohet gjithashtu më fuqishëm,” shkroi ai, duke theksuar se qëllimi është mbështetja e ligjit ndërkombëtar dhe jo ndëshkimi i qytetarëve izraelitë.
Ky vendim vjen ndërsa disa vende të tjera, përfshirë Francën, Mbretërinë e Bashkuar, Kanadanë dhe Australinë, njoftuan plane të ngjashme për njohjen e Palestinës gjatë Asamblesë së Përgjithshme, duke u bashkuar me 147 vende që tashmë e kanë bërë këtë. Asambleja e Përgjithshme fillon më 9 shtator.
Situata në Territorin Palestinez mbetet kritike. Izraeli vazhdon të pushtojë territoret palestineze dhe refuzon një tërheqje që do të mundësonte një shtet të pavarur palestinez me Kudsin Lindor si kryeqytet, në kufijtë para vitit 1967.
Bllokada e plotë e Rripit të Gazës, në fuqi që nga marsi, ka krijuar kushte katastrofike për 2,4 milionë banorët e enklavës, duke shkaktuar uri, sëmundje dhe kolaps të shërbimeve themelore.
Ndërkohë, Gjykata Ndërkombëtare Penale ka lëshuar urdhra arresti për kryeministrin izraelit Benjamin Netanyahu dhe ish-ministrin e Mbrojtjes Yoav Gallant për krime lufte dhe krime kundër njerëzimit në Gaza, dhe Izraeli përballet me një padi për gjenocid në Gjykatën Ndërkombëtare të Drejtësisë./Euronews Albania/
