Deri para dy ditësh, kemi dyshuar që Dejona Mihali i drejton dhe kontrollon institucionet shtetërore të Republikës së Kosovës. Prej dje, nuk dyshojmë më. Tash e dimë.
Shkruan: Berat Buzhala
Komunikimi i saj intensive me Nagip Krasniqin, për çdo gjë në KEK, çdo shoqëri normale do ta çonte në këmbë. Kurse shoqërinë tonë, e demokratizon.
Shumë kohë më parë, Nacionale kishte botuar një tekst – me burime – se Dejona është njëfarë Kadri Veseli i Albin Kurtit, mirëpo dje, e morëm vesh që Dejona është edhe Adem Grabovci e edhe Kadri Veseli – së bashku.
Sigurisht që asnjë krahasim nuk është perfekt, e as ky i Dejonës me Kadriun dhe Ademin.
Adem Grabovci e ka një vëlla dëshmor, kurse vetë ka luftuar me armë në dorë për lirinë e këtij vendi. Kadri Veseli në anën tjetër, është i dënuar në mungesë nga regjimi serb sepse është prej të parëve, fjalëpërfjalshëm prej të parëve që personalisht ka dalë me kallashnikov dhe ka vra milicë serbë.
Pastaj, këtë rezistencë e ka vazhdu edhe për një dekadë.
Dejona luftën e vetme, qysh shihet nga bisedat me drejtorin e KEK-ut Nagip Krasniqi, e ka me shqiptarët.
Ajo as nuk e di se çka është sakrifica e as vuajtja për këtë vend. Nesër me u bë m*t këtu, ajo kapërcen kufirin edhe shkon në Greqi, te familja e saj.
Dejona as nuk është votuar e as nuk është emëruar prej askujt që të udhëheq, që të jetë njëfarë kryeministri në hije.
Nuk ka marrë pjesë në zgjedhje, nuk ka kaluar në Kuvendin e Kosovës e as në Qeverinë e Kosovës, si një zyrtare që veshet me pushtet, që e tejkalon edhe Kushtetutën edhe ligjet e vendit.
Njerëzit si Dejona, në vende demokratike, në vende ku sundon ligji, quhen me emrin e vërtetë: “Nëntokë”. Sepse qeverisen nga nëntoka, në errësisë, jashtë syve të publikut, pa transparencë e pa llogaridhënie, vetëm duke përdorur platforma dhe aplikacione të cilat ajo mendon se i garantojnë raporte sekrete.
Nuk e di sa prej jush i keni lexuar komunikimet e saj me Nagip Krasniqin, të cilat i botoi Nacionale, por aty, mes tjerash, Dejona i jep urdhër Nagip Krasniqit që të blejë rrymë në Shqipëri, sepse sipas saj, ‘ishte jetike që të kishim rrymë në dy ditët e ardhshme’.
Nagipi i ishte bindur dhe nga të dhënat që ne i posedojmë, në ato dy ditë kushti, ai ka blerë rrymë në Shqipëri.
Këto operacione financiare, që në kushte normale do të duhej të kalonin përmes Bordeve dhe strukturave të KEK-ut, ose të Qeverisë, kanë kaluar vetëm nëpërmjet gojës së Dejonës. Janë shpenzuar miliona euro, vetëm pse ajo ka thënë ashtu, ose ka menduar ashtu.
A ka mundësi që ajo në ndërkohë, e ka bë pazarin me ata në Shqipëri, për shkak të çmimit të rrymës? A ka mundësi që ai i Shqipërisë t’i ketë dhënë ryshfet Dejonës, apo Albinit, që ato dy ditë Kosova të blente rrymën? A ka mundësi që ajo rrymë i ka mbetë Shqipërisë pa u shitur, prandaj donin ta heqnin atë rrymë?
Pse ato dy ditë duhej me ble, e jo dy ditë të tjera? Ose, nëse vemdimmarrja qenka kaq e thjeshtë, pse i harxhojmë miliona euro që të kemi institucione dhe borde të cilat paguhen që të mendojnë dhe të veprojnë në tema të tilla?
Mirëpo, problem është që çka kemi pa dhe çka kemi lexuar, është vetëm tema e KEK-ut dhe e rrymës. Për Dejonën, KEK-u, rryma, tenderët në KEK, janë vetëm njëra prej punëve të saja ditore.
Dejona, këtë e dimë të gjithë, në baza ditore merret me mediat, emëron dhe shkarkon njerëz në RTK, cakton njerëz nëpër Borde; ajo e menaxhon rregulisht Ministrinë e Mbrojtjes, tregon kush ka me bë me hëngër atje, kush ka m’e dhënë urdhëra.
Njerëz brenda këtij institucioni (Ministrinë e Mbrojtjes), më kanë treguar se Dejona e takon rregullisht Shemsi Sylën, i cili është zëvendësministër e i cili, tash po ia ha kryet edhe ministrit të dytë të kësaj ministrie. Fuqia e Shemit i vjen nga Dejona, sepse Shemin, ta kishin heq ‘luksh’ prej aty.
Gjithashtu, anash prej këtyre punëve, fokuesi kryesor i Dejonës ka qenë dhe vazhdon të jetë Policia dhe AKI-ja. Kurse ky focus i saj në institucionet e sigurisë, nuk ka të bëj as me Beogradin, as me Listën Serbe e as me Radojçiqin. Ka të bëj me shqiptarët.
Ka dyshime të forta, se ajo është shumë afër që ta shkatërrojë edhe një prej institucioneve më të forta në vendin tonë: AKI-në.
Nuk i kemi bisedat e saj, qysh i patëm në rastin e Nagip Krasniqit, mirëpo njerëz që kanë informata, tregojnë se Dejona e ka krijuar një trupë të pavarur në kuadër të AKI-së, të cilët nuk i japin përgjegjësi Drejtorit, por asaj.
Shumëkush, e quan atë organizatë në kuadër të Aki-së, ose atë trupë në kuadër të AKI-së si ‘Grupi i Gjilanit’. Ata janë pranuar në AKI kohëve të fundit, kurse mission nuk e kanë luftimin e rrezikut nga jashtë, por luftimin e armiqve të brendshëm.
Rasti më ilustrativ i kësaj skeme, është raportimi i asaj gazetës së Bosnjës, Slobodna Bosna, të cilës një agjent i AKI-së i ka thënë se Nacionale dhe Periskopi janë blerë dhe kontrollohen nga Serbia.
Për këtë temë, drejtori i AKI-së, ka thënë se AKI nuk është e përfshirë dhe se AKI nuk ka këso të dhënash për Nacionalen dhe Periskopin. Kështu pati deklaruar Presidentja Vjosa Osmani.
Eh, problem është që në fakt, AKI ka qenë e përfshirë. Njerëz brenda AKI-së, të cilat nuk i japin llogari drejtorit të AKI-së e as Presidentes së vendit, por i japin Dejona Mihalit, janë vënë në shërbim të saj, që t’i luftojnë në mënyrë joligjore ata të cilët e kundërshtojnë shefin e Dejonës, Albinin.
Kjo është e rrezikshme për sigurinë e vendit. Kjo veprimtari është në kufirin e tradhëtisë kombëtare sepse i shndërron trupat e pavarura, ato që i shërbejnë sigurisë së vendit, në trupa ekstremiste partizane, të cilët nuk e kanë mission sigurinë e vendit, por luftën e brendshme.
Në krye të këtij inkuzicioni qëndron Dejona Mihali, me bekimin dhe lejen e Albin Kurtit.
