Në Kosovë, ka në një numër të rasteve kur të pandehurit që përbejnë interes publik iu shmangën drejtësisë me pretendimet për gjendje shendetesore.
Nëse kthehemi një vit e gjysmë pas, më 2 mars 2023, Policia e Kosovës në bashkëpunim me Prokurorinë Themelore të Ferizajt si dhe Administratën Tatimore të Kosovës pas një aksioni arrestuan 15 persona në rastin e njohur si “Brezovica”.
Ata dyshoheshin se kanë kryer veprat penale “Fajdeja”, “Shmangia nga tatimi” dhe “Detyrimi”.
Prokuroria kishte kërkuar paraburgimit për 15 të arrestuarit.
Gjykata Themelore në Ferizaj, më 5 mars 2023 kishte caktuar masën e paraburgimit për 14 të dyshuarit e arrestuar. I vetmi që nuk ishte dërguar në paraburgim për shkak të arsyeve shëndetësore ishte pronari i Auto sallonit “Alberti”, Skender Bajrami, të cilit gjykata i kishte caktuar masën e ndalimit të ofrimit vendit ose personit të caktuar.
Skender Bajrami madje ishte shtrirë në QKUK në klinikën e kardiologjisë duke pretenduar se ka probleme shëndetësore, kjo kishte bërë që edhe seanca ndaj tij të mbahej në QKUK.
Por, pas vendimit të gjykatës, edhe shtrimi në spital i Bajramit ishte i shkurtë.
Tre ditë pas, me 8 mars 2023 ai mori pjesë në hapjen e Prishtina Mall ku edhe është aksionar. Ndryshe prej të tjerëve që iu kishte vazhduar paraburgimi dhe arresti shtëpiak, ai vazhdonte të ishte në masën e ndalimit të ofrimit të personave të caktuar. Deri më 25 tetor 2023 kur të gjithëve iu kishin ndërprerë masat.
Lidhur me këtë, “Betimi për Drejtësi”, ka tentuar të marrë përgjigje nga vetë Skender Bajrami se si kishte arritur të shërohej kaq shpejtë për të qenë i gatshëm për aktivitetet publike, por nuk ka arritur të kontaktojë me të. Tashme avokati i tij, Taulant Ferizi ka thënë se Bajrami nuk deklarohet për media dhe pse për çdo gjë rreth tij flet ai. Por, as ai nuk është përgjigjur.
Ndryshe, Veriu.info vitin e kaluar kishe raportuar ekskluzivisht për arrestimin e Skender Bajramit, mbajtjen e seancën në QKUK dhe pjesëmarrjen e tij në hapjen e Prishtina Mall, ku është aksionar.
Së fundmi, është rasti i Ismet Osmanit “Curri”, i cili akuzohet për fajde dhe në prill të këtij viti dyshohet se është përfshirë edhe në një tentim vrasje, për çka është edhe në arrati. Ai dyshohet se ka falsifikuar raporte mjekësore të cilat i ka paraqitur në Gjykatë me qëllim të t’i ikë marrjes së dorëzanisë rreth 50 mijë pasi nuk u paraqit në gjykim. Po ashtu të “dëshmojë” se nuk ishte i përfshirë në tentim vrasje pasi ishte në shërim jashtë vendit.
Këto dokumente mjekësore tashme po hetohen nga prokuroria.
Melos Kolgji nga Instituti i Kosovës për Drejtësi, ka thënë se rastet shëndetësore po përdoren padrejtësisht.
“Këto raste dhe kjo situatë ngjallë dyshime se në këto raste po përdoren pa drejtësisht arsyet shëndetësore për të zvarritur procese të ndryshme. E kuptojmë se është shumë legjitime shtyrja e proceseve gjyqësore për arsye shëndetësore. Megjithatë, kur kemi situata kaq të shpeshta, kjo më pastaj krijon dyshime se kemi të bëjmë me strategji mbrojtëse dhe jo me arsye shëndetësore. Veçanërisht pas situatës së krijuar në lidhje me dyshimet për falsifikimin e dokumenteve”, ka thënë ai.
