Profesori universitar, Blerim Latifi, ka reaguar ashpër lidhur me zhvillimet e fundit politike dhe largimin e gjuhës shqipe nga tabela zyrtare në kufirin e Maqedonisë së Veriut.
Latifi përmes një postimi në rrjetin social Facebook e cilësoi kryetarin e Bashkimit Demokratik për Integrim (BDI), Ali Ahmetin si “një nga etërit themeltarë të UÇK-së” dhe si njeriun që i dha emrin Ushtrisë Çlirimtare të Kosovës.
“Një nga etërit themeltarë të UÇK-së, për më shumë njeriu që i dha emrin asaj, themelues e drejtues i Ushtrisë Çlirimtare Kombëtare, Ali Ahmeti, i formësuar brenda një ideologjie me bazë Rilindjen Kombëtare Shqiptare, ishte mohikani i fundit i kësaj platforme në politikën shqiptare në Maqedoni”, ka shkruar ai.
Sipas Latifit, përpjekjet për ta “defaktorizuar dhe larguar nga pushteti” Ahmetin, si nga qarqe brenda Maqedonisë së Veriut ashtu edhe nga disa qarqe politike në Kosovë, përbëjnë një gabim të rëndë politik dhe historik.
“Turravrapi nga brenda Maqedonisë dhe nga disa qarqe politike të Kosovës për ta defaktorizuar e larguar nga pushteti ishte një marrëzi, që historia shqiptare do ta mbajë mend pikërisht si të tillë. Kjo marrëzi suicidale ua hapi rrugën e sigurtë sllavëve maqedonas për të filluar procesin e përmbysjes graduale të krejt asaj që arritën shqiptarët pas vitit 2001.Sot, forcat e rezistencës shqiptare kundër këtij procesi në Maqedoni janë fare të pakta. Nacionalizmi maqedonas, në aleancë me ideologjinë e Muslim Brotherhood, e cila ka shtrirë tentakulat e saj në çdo pore të popullatës shqiptare, janë duke e varrosur nacionalizmin shqiptar në Maqedoni”, ka shkruar tutje ai.
Latifi në reagimin e tij ka bërë një krahasim me fatin e Shqiptarëve në Novi Pazar dhe në Mal të Zi, duke paralajmëruar se “kombinimi i fesë me politikën diskriminuese serbe e malazeze i kishte shndërruar nga shqiptarë në boshnjakë”.
“Një ditë do të vajtojmë për ta, ashtu siç vajtojmë sot për shqiptarët e Novi Pazarit dhe të Malit të Zi, të cilët kombinimi i fesë me politikën diskriminuese serbe e malazeze i kishte shndërruar nga shqiptarë në boshnjakë”, ka shkruar Latifi.
Reagimi i plotë:
