Njohësi i futbollit Kujtim Zebica ka analizuar vendimin e Kosovës për të braktisur ndeshjen kundër Rumanisë, duke e cilësuar atë si një veprim me dy anë të medaljes: politike dhe sportive.
Sipas Zebicës, nga ana politike, veprimi ishte i drejtë dhe i domosdoshëm për të reaguar ndaj mungesës së respektit dhe racizmit të tifozëve rumunë. “Ky ishte një mesazh i qartë për mbrojtjen e dinjitetit të Kosovës dhe kundërshtimin e sjelljeve të papranueshme raciste,” tha Zebica.
Por nga ana sportive, pasojat mund të jenë të rënda. Zebica paralajmëron se Kosova rrezikon të humbasë ndeshjen në tavolinë, të përballet me gjoba, zbritje pikësh, apo edhe përjashtim nga garat e ardhshme. “FIFA dhe UEFA janë shumë strikte kur bëhet fjalë për ruajtjen e rregullave të lojës. Braktisja e një ndeshjeje është një shkelje serioze,” shtoi ai.
Megjithatë, Zebica thekson se ky vendim shënon një qëndrim të qartë për mbrojtjen e identitetit shtetëror, duke reflektuar një ndryshim të qasjes krahasuar me përballjet e mëparshme. “Në këtë rast, Kosova zgjodhi të mbrojë dinjitetin kombëtar, duke anashkaluar pasojat e mundshme sportive,” përfundoi Zebica.
