Në ditën kur u votua si mandatar nga anëtarët e Këshillit të Përgjithshëm të partisë së tij, kreu i VV-së, Albin Kurti, hodhi akuza ndaj Gjykatës Kushtetuese, pas vendimit të fundit lidhur me masën e përkohshme për punën e Kuvendit të Kosovës.
Ai tha se kjo gjykatë është si hije politike e opozitës ndaj VV-së.
“Sepse 5 nga 7 gjyqtarët e Gjykatës Kushtetuese janë zgjedhur në vitin e largët 2018 kur në pushtet ishte koalicioni i PAN-it me Listën Serbe. E pas vitit 2018, ne i fitojmë zgjedhjet për herë të parë në vitin 2019. Pastaj fitojmë zgjedhjet në herën e dytë në vitin 2021, e i fitojmë edhe sivjet për herë të tretë, por ja që ata ngelën të njëjtit aty në gjykatë, thua se është viti 2018”, tha Kurti.
Kjo deklaratë ngjalli shqetësim te Gjykata Kushtetuese, e cila reagoi sot, duke kërkuar që të ndalet gjuha e tillë, duke thënë se pavarësia e Gjykatës Kushtetuese nuk është privilegj i gjyqtarëve të saj, por është themel i shtetit të së drejtës.
“Pavarësia dhe paanshmëria e Gjykatës Kushtetuese të Republikës së Kosovës janë të mbrojtura me Kushtetutë, dhe asnjë institucion, parti politike apo individ nuk mund të ndërhyjë në punën e saj. Çdo përpjekje për të ushtruar presion mbi gjyqtarët kushtetues përbën cenim të parimit themelor të ndarjes së pushteteve dhe minon besimin e qytetarëve në sundimin e ligjit dhe në vetë demokracinë”, thuhet ndër të tjera në reagim.
Lidhur me këtë, hulumtuesi i lartë nga KDI, Vullnet Bugaqku, në një prononcim për Gazeta Blic, thotë se akuzat ndaj Kushtetueses janë bërë normë e zyrtarëve të lartë të shtetit.
“Akuzat e drejtuara ndaj Gjykatës Kushtetuese, kohëve të fundit janë bërë normë e punës e disa politikanëve ose zyrtarëve të lartë shtetëror, të cilët në mungesë njohurish mbi konceptet e funksionimit të gjyqësisë kushtetuese e shtetit të së drejtës, japin deklarata të pa qëndrueshme, të cilat janë të dëmshme karshi funksionimit të demokracisë kushtetuese e parlamentare ne vendin tonë”, shprehet ai.
Bugaqku këto deklarata i sheh si cenim dhe ndërhyrje në pavarësinë e Gjykatës Kushtetuese, si dhe tendencë për të minuar besimin te gjyqtarët e kësaj gjykate.
