120 ushtarë është numri i personelit ushtarak që Bullgaria do ta nisë drejt Kosovës.
Ata do të marrin pjesë në forcat operacionale rezervë të Forcës Stabilizuese të NATO-s në Kosovë.
Kontigjenti bullgar, që përbëhet kryesisht nga forca tokësore të Brigadës së Tretë të Komandës në Blagoevgrad, do të kryejë detyra për të mbajtur sigurinë në Kosovë.
Në ceremoninë solemne të mbajtur sot në Blagoevgrad, zyrtarët bullgarë kanë thënë se Sofja është e përkushtuar për sigurinë e Ballkanit Perëndimor.
“Në kohëra të ballafaqimeve gjeopolitike, Forcat tona të Armatosura janë dorëzanë të paqes e stabilitetit jo vetëm në Bullgari, por edhe për rajonin ku jetojmë. Me vendosjen tuaj plotësuese, kontributi ynë afatgjatë në operacionin e NATO-s në Kosovë është domethënës”, ka thënë kreu i Mbrojtjes, admiral Emil Eftimov, përcjell një kumtesë e Ministrisë bullgare të Mbrojtjes.
“Ky mision është një shembull tejet i mirë sesi Ushtria bullgare po përmbush me nder angazhimet e saj për sigurinë e Ballkanit perëndimor”.
Me këtë rast, Eftimov ka bërë me dije se për këtë vit Bullgaria është vendi prijatar në Batalionin e Dytë Shumëkombësh të Forcave Operacionale Rezervë të NATO-s në Kosovë.
Duke iu dëshiruar sukses pjesëtarëve bullgarë të këtij misioni, admirali Eftimov ka shprehur besimin se ata do t’i kryejnë me përpikmëri detyrat që kanë marrë përsipër.
“Përvoja që fitoni në këso misione ka rëndësi për përgatitjen tuaj për aksion në mjedise shumëkombëshe – si në komandim të batalionit ashtu edhe në zbatim të procedurave të përbashkëta operacionale. Përvoja juaj do të jetë aseti më i madh kur të ktheheni në vendlindje, nga ku do të mbështetem që të punoni fort që të shtoni aftësitë e ushtrisë bullgare”, ka shtuar kreu i Mbrojtjes.
Bëhet e ditur se komandant i Brigadës së Dytë Shumëkombëshe është koloneli, Jordan Ivanov, kurse komandant i kompanisë së mekanizuar është lejtnant Ivan Dukov.
